ठाणे (Tyre Godown Fire) : महाराष्ट्रातील ठाणे जिल्ह्यात मंगळवारी (९ जून) दुपारी एका टायर गोदामाला भीषण आग लागल्याची घटना घडली. मुंब्रा परिसरातील शिळफाटा येथे असलेल्या टायरच्या गोदामात ही आग लागली असून, आगीमुळे परिसरात घबराटीचे वातावरण निर्माण झाले आहे. आगीतून निघणारे काळ्या धुराचे प्रचंड लोट अनेक किलोमीटर अंतरावरूनही दिसत होते.
घटनेची माहिती मिळताच ठाणे अग्निशमन दल आणि स्थानिक पोलीस तात्काळ घटनास्थळी दाखल झाले. त्यांनी आग विझविण्यासाठी युद्धपातळीवर प्रयत्न सुरू केले. गोदामात मोठ्या प्रमाणात ज्वलनशील साहित्य असल्याने आग वेगाने पसरल्याचे सांगितले जात आहे.
सोशल मीडियावर व्हायरल झालेल्या व्हिडिओंमध्ये संपूर्ण परिसर काळ्या धुराने व्यापल्याचे दिसून येत आहे. आगीमुळे परिसरातील वाहतुकीवरही परिणाम झाला असून काही ठिकाणी मोठी वाहतूक कोंडी निर्माण झाल्याची माहिती आहे.
आग आटोक्यात आणण्यासाठी अग्निशमन दलाच्या अनेक गाड्या घटनास्थळी दाखल झाल्या असून आग नियंत्रणात आणण्याचे प्रयत्न सुरू आहेत.
दरम्यान, आग लागण्याचे नेमके कारण अद्याप स्पष्ट झालेले नाही. प्राथमिक अंदाजानुसार शॉर्टसर्किटमुळे ही आग लागली असावी, असा संशय व्यक्त करण्यात येत आहे. सध्या या घटनेत कोणतीही जीवितहानी किंवा जखमी झाल्याची अधिकृत माहिती समोर आलेली नाही.
