मध्यरात्री दीड वाजता थरार; पतसंस्थेच्या कार्यालयातील कागदपत्रांचेही मोठे नुकसान
निलंगा : शहरातील लातूर-बिदर रोडवरील अटल वॉकच्या शेजारी असलेल्या तीन मजली इमारतीला गुरुवारी मध्यरात्री सुमारे १.३० वाजण्याच्या सुमारास भीषण आग लागली. आगीत तळमजल्यावरील कॉलिटी इंटरप्राईजेस हे दुकान पूर्णपणे जळून खाक झाले. दुकानात मोठ्या प्रमाणावर प्लास्टिक व इंजिनिअरिंग साहित्याचा साठा असल्याने आगीने काही वेळातच रौद्ररूप धारण केले.
आगीची तीव्रता एवढी होती की तिची झळ इमारतीच्या वरील दोन मजल्यांवर असलेल्या बंधन पतसंस्थेच्या कार्यालयालाही बसली. कार्यालयातील महत्त्वाची कागदपत्रे व साहित्य जळून खाक झाल्याचा प्राथमिक अंदाज व्यक्त करण्यात येत आहे. सुमारे २.१५ वाजेपर्यंत अथक प्रयत्नांनंतर आग आटोक्यात आणण्यात यश आले.
घटनेची माहिती मिळताच माजी नगराध्यक्ष बाळासाहेब शिंगाडे, उपनगराध्यक्ष मनोज कोळ्ळे व सौरभ नाईक यांनी घटनास्थळी धाव घेत अग्निशमन दलाला पाचारण केले. अग्निशमन दलाचे वाहन घटनास्थळी दाखल झाले; मात्र वाहनातील पाणी संपल्याने पुन्हा पाणी भरण्यासाठी जावे लागले. त्यामुळे काही काळ आग अधिकच भडकली आणि परिस्थिती नियंत्रणाबाहेर जाण्याची शक्यता निर्माण झाली.
यानंतर पोलीस यंत्रणा, नगरपालिका प्रशासन तसेच स्थानिक नागरिकांनी आग विझविण्यासाठी शर्थीचे प्रयत्न केले. बराच वेळ सुरू असलेल्या प्रयत्नांनंतर अखेर आगीवर नियंत्रण मिळविण्यात यश आले. सुदैवाने या घटनेत कोणतीही जीवितहानी झाली नाही.
दरम्यान, आगीत दुकानाचे मोठ्या प्रमाणात नुकसान झाल्याचे समजताच दुकानमालक पी. डी. पवार यांची प्रकृती खालावली. त्यांना तातडीने खासगी रुग्णालयात उपचारासाठी दाखल करण्यात आले.
या आगीत दुकानातील साहित्य तसेच पतसंस्थेच्या कार्यालयाचे लाखो रुपयांचे नुकसान झाल्याचा प्राथमिक अंदाज आहे. मात्र, आगीचे नेमके कारण अद्याप स्पष्ट झालेले नसून त्याबाबत तपास सुरू आहे.
