उपवासासाठी जेवणापासून दूर बसल्या अन् क्षणात संकट कोसळले
सेनगाव/ रिसोड (Wild Boar Attack) : शेतात हळद लागवडीचे काम सुरू होते. महिलांचा गट जेवणासाठी थांबला होता. मात्र उपवास असल्याने एक महिला थोडी बाजूला बसली आणि काही क्षणांतच तिच्यावर रानडुकराने जीवघेणा हल्ला चढविला. सेनगाव तालुक्यातील वाघजाळी शिवारात गुरुवारी दि. २५ जून सकाळी सुमारे ११ वाजता घडलेल्या या घटनेने परिसर हादरला आहे.
या (Wild Boar Attack) हल्ल्यात सेनगाव तालुक्यातील वाघजाळी येथील हनीफा बी फिरोज खान पठाण वय ३२, या महिला गंभीर जखमी झाल्या असून त्यांच्यावर अकोला येथे उपचार सुरू आहेत. मिळालेल्या माहितीनुसार, हनीफा बी या इतर महिलांसह शेतात हळद लागवडीचे काम करत होत्या. कामादरम्यान सर्व महिला जेवणासाठी बसल्या. मात्र, मोहर्रमचा रोजा असल्याने हनीफा बी यांनी जेवण न करता काही अंतरावर जाऊन विश्रांतीसाठी बसण्याचा निर्णय घेतला.
दरम्यान, शेतालगतच्या झुडपातून अचानक बाहेर आलेल्या रानडुकराने थेट त्यांच्यावर हल्ला केला. हा (Wild Boar Attack) हल्ला इतका अचानक होता की उपस्थित महिलांना काही क्षण काय घडले हेच समजले नाही. आरडाओरड, धावपळ आणि भीतीचे वातावरण निर्माण झाले. स्थानिक नागरिक व उपस्थित महिलांनी प्रसंगावधान राखत जखमी महिलेला तातडीने रिसोड ग्रामीण रुग्णालयात दाखल केले. डॉक्टरांनी प्राथमिक उपचार केल्यानंतर प्रकृती गंभीर असल्याने त्यांना अकोला येथे पुढील उपचारासाठी हलविण्यात आले.
या (Wild Boar Attack) घटनेनंतर वाघजाळी परिसरात शेतात जाणाऱ्या महिला व शेतमजुरांमध्ये भीतीचे वातावरण पसरले आहे. विशेषतः पावसाळी हंगामात शेत परिसरात वन्य प्राण्यांचा वाढलेला वावर चिंतेचा विषय ठरत आहे. वनविभागाने तातडीने पाहणी करून रानडुकरांचा बंदोबस्त करावा, तसेच शेतकरी व शेतमजुरांच्या सुरक्षेसाठी ठोस उपाययोजना कराव्यात, अशी जोरदार मागणी ग्रामस्थांनी केली आहे.
