छत्रपती संभाजीनगर (Student Mental Health) : दहावीचा निकाल जाहीर होण्याआधीच छत्रपती संभाजीनगरमध्ये एक हृदयद्रावक घटना घडली आहे. निकालाच्या भीतीने दहावीतील विद्यार्थ्याने आत्महत्या केल्याची धक्कादायक माहिती समोर आली आहे. पुंडलिक नगर परिसरातील ही घटना असून, सोहम ज्ञानेश्वर मोरे (वय १७) असे या विद्यार्थ्याचे नाव आहे.
मिळालेल्या माहितीनुसार, सोहम हा दहावीत शिकत होता आणि आज त्याचा निकाल लागणार होता. मात्र, आपण परीक्षेत उत्तीर्ण होऊ शकणार नाही, या भीतीने त्याच्या मनावर प्रचंड ताण निर्माण झाला होता. या मानसिक दडपणातूनच त्याने आज सकाळी राहत्या घरी गळफास घेत जीवन संपवलं.
ही घटना पुंडलिक नगरमधील गल्ली क्रमांक १० येथे घडली. घटनेची माहिती मिळताच पोलिसांनी तात्काळ घटनास्थळी धाव घेतली आणि मृतदेह ताब्यात घेऊन पुढील तपास सुरू केला आहे.
सोहमच्या या टोकाच्या निर्णयामुळे मोरे कुटुंबावर दुःखाचा डोंगर कोसळला असून, परिसरात शोककळा पसरली आहे. या घटनेमुळे विद्यार्थ्यांवरील परीक्षेचा वाढता ताण आणि मानसिक आरोग्याचा गंभीर प्रश्न पुन्हा एकदा ऐरणीवर आला आहे.
