कळमनुरी (Stray Dogs) : कळमनुरी शहरात मोकाट कुत्र्यांचा सुळसुळाट वाढल्याने नागरिक त्रस्त झाले असून, विशेषतः लहान मुलांच्या सुरक्षेचा प्रश्न ऐरणीवर आला आहे. शहरातील विविध भागांमध्ये मोकाट कुत्र्यांच्या टोळ्या फिरत असल्याने पालकांमध्ये भीतीचे वातावरण निर्माण झाले आहे.
रात्रीच्या वेळी रस्त्यावरून पायी जाणाऱ्या नागरिकांवरही मोकाट कुत्रे धावून येत असल्याच्या तक्रारी वाढल्या आहेत. त्यामुळे चावण्याच्या घटना किंवा अपघात होण्याची भीती नागरिकांकडून व्यक्त केली जात आहे.
या गंभीर समस्येकडे नगरपालिका प्रशासनाचे दुर्लक्ष होत असल्याचा आरोप नागरिकांनी केला आहे. मोकाट कुत्र्यांचा बंदोबस्त करण्यासाठी अद्याप कोणतीही ठोस उपाययोजना करण्यात आलेली नसल्याने शहरवासीयांमध्ये संताप व्यक्त केला जात आहे.
नगरपालिका प्रशासनाने तातडीने मोकाट कुत्र्यांना पकडण्यासाठी विशेष मोहीम राबवावी तसेच नागरिकांच्या सुरक्षेसाठी आवश्यक उपाययोजना कराव्यात, अशी मागणी शहरवासीयांनी केली आहे.
