वन विभाग आणि स्थानिक गुन्हे शाखेची संयुक्त कारवाई; १६ किलो मांसासह दोघे ताब्यात
सेनगाव तालुक्यातील धनगरवाडी शिवारात हरिणाची शिकार करून त्याचे मांस आपसात वाटून घेत असलेल्या दोघांना वन विभाग आणि स्थानिक गुन्हे शाखेच्या संयुक्त पथकाने रविवारी रंगेहाथ पकडले. कारवाईदरम्यान आरोपींकडून १६ किलो हरिणाचे मांस, कातडी आणि शिकार करण्यासाठी वापरलेले जाळे जप्त करण्यात आले.
हरिणाची शिकार केली जात असल्याची माहिती वन विभागाला मिळाल्यानंतर संबंधित परिसरावर मागील दहा दिवसांपासून लक्ष ठेवण्यात येत होते. रविवारी शिकार केलेल्या हरिणाच्या मांसाची वाटणी सुरू असल्याची माहिती पथकाला मिळाली. त्यानंतर तातडीने संयुक्त कारवाई करण्यात आली.
विभागीय वन अधिकारी डॉ. राजेंद्र नाळे, सहाय्यक वन अधिकारी सचिन माने, वनपरिक्षेत्र अधिकारी माधव केंद्रे यांच्या मार्गदर्शनाखाली वन विभागाचे पथक आणि गुन्हे शाखेचे सहाय्यक पोलिस निरीक्षक दिलीप मोरे, जमादार साईनाथ कंठे, कुमार मगेर व सुभाष घुगे यांनी छापा टाकला. या कारवाईत दोघांना ताब्यात घेण्यात आले.
दरम्यान, या शिकारीच्या घटनेत आणखी काही व्यक्ती सहभागी असण्याची शक्यता वन विभागाने व्यक्त केली आहे. ताब्यात घेतलेल्या दोघांची सध्या कसून चौकशी सुरू असून, शिकारीमागील इतर सहभागींची माहिती मिळवण्याचा प्रयत्न केला जात आहे.
या प्रकरणात वन्यजीव कायद्यानुसार गुन्हा दाखल करण्याची प्रक्रिया सुरू आहे.
