पोलिस अधीक्षकांच्या पथकाचा छापा; जेसीबी यंत्र जप्त, बोट केली नष्ट
परभणी (Sand Mafia Action) : पोलिस अधीक्षक पंकज कुमावत यांच्या पथकाने शनिवार, १६ मे रोजी दुपारी १ च्या सुमारास नांदगाव शिवारातील पूर्णा नदी पात्रात वाळूची चोरटी वाहतूक करणाऱ्यांवर छापेमारी केली. या कारवाईत जेसीबी मशीन जप्त करण्यात आली. तसेच वाळू उपशासाठी वापरण्यात येणारी बोट नष्ट करण्यात आली.
पोलीस उपनिरीक्षक टरके, पोलिस अंमलदार सुर्यकांत ताटीकोंडलवार, सय्यद इरशाद, वाघमारे, चुडावेकर, शेख असलम, वाव्हळे यांच्या पथकाने अवैध धंद्याची माहिती घेत गस्त घालत असताना नांदगाव शिवारात पूर्णा नदी पात्रातून चोरट्या पद्धतीने वाळूचा उपसा होत असल्याची माहिती मिळाली.
या माहितीच्या आधारे पोलिसांनी तात्काळ छापा टाकत एक जेसीबी यंत्र आणि बोट जप्त केली. घटनास्थळी मोहम्मद तोहीद मोहम्मद कुरशीद हा इसम आढळून आला. पोलिसांनी त्याची चौकशी करून जेसीबी यंत्र जप्त केले. तसेच घटनास्थळी आढळलेली वाळू उपशासाठी वापरली जाणारी बोट मंडळाधिकारी शिंदे व त्यांच्या पथकाने जागीच नष्ट केली.
देशोन्नतीचे प्रतिनिधी कारवाईच्या ठिकाणी पोहोचताच अवघ्या अर्ध्या तासात बोट स्फोटाद्वारे नष्ट करण्याची कारवाई करण्यात आली.
महसूलचे पथक, पूर्णा पोलिस ‘मॅनेज’?
पोलिस अधीक्षकांच्या पथकाने कारवाई केलेल्या ठिकाणी महसूल विभागाचे पथक देखील उपस्थित होते. या पथकातील कर्मचारी वाहन उभे करून रिंगण मारून बसले होते. या ठिकाणाहून सुरू असलेल्या वाळू उपशाकडे पूर्णा पोलिसांचे दुर्लक्ष होत असल्याची चर्चा आहे. महसूल व पूर्णा पोलिसांचे पथक ‘मॅनेज’ असल्याच्या चर्चेलाही उधाण आले आहे.
