शेतकरी नंदकिशोर गायकवाड यांच्या फळबागेला दिली भेट
नांदेड (MLA Sadabhau Khot) : विधी मंडळ अंदाज समिती सध्या नांदेड जिल्ह्याच्या दौऱ्यावर असून, या दौऱ्यादरम्यान गुरुवारी समितीचे सदस्य आणि माजी आ. सदाभाऊ खोत (MLA Sadabhau Khot) यांनी भोकर मतदारसंघातील भोसी येथील एका प्रगतशील शेतकऱ्याच्या फळबागेला अचानक भेट दिली. माळराणासारख्या खडकाळ जमिनीत फुलवलेली ही फळबाग पाहून त्यांनी शेतकऱ्याचे विशेष कौतुक केले.
भोसी येथील प्रगतशील शेतकरी नंदकिशोर गायकवाड यांनी आपल्या माळराणावरील शेतात विविध प्रकारच्या फळबागांची लागवड केली आहे. गुरुवारी सायंकाळी चार वाजेच्या सुमारास सदाभाऊ खोत (MLA Sadabhau Khot) यांनी या बागेला भेट देऊन पाहणी केली. केवळ पारंपरिक पिके न घेता, आधुनिक तंत्रज्ञानाचा वापर करून गायकवाड यांनी माळराणावर जे प्रयोग केले आहेत, ते पाहून खोत थक्क झाले.
या भेटीदरम्यान सदाभाऊ खोत (MLA Sadabhau Khot) यांनी बागेतील विविध फळझाडांची सविस्तर माहिती घेतली. गायकवाड यांच्या बागेत जपानचा प्रसिद्ध 'मियाझाकी' आंबा, थायलंडचा 'रेड आयवरी', बनाना आंबा, तसेच पांढरा जांभूळ आणि सफरचंद यांसारख्या दुर्मिळ व विदेशी फळझाडांची यशस्वी लागवड करण्यात आली आहे. अत्यंत कष्टाने माळराणावर हे नंदनवन फुलवल्याबद्दल खोत यांनी गायकवाड कुटुंबीयांचे अभिनंदन केले.याप्रसंगी नंदकिशोर गायकवाड, त्यांच्या कुटुंबातील सदस्य आणि परिसरातील ग्रामस्थ मोठ्या संख्येने उपस्थित होते. विधी मंडळ अंदाज समितीच्या या भेटीमुळे आणि सदाभाऊ खोत यांनी केलेल्या कौतुकामुळे भोसी येथील शेतकऱ्यांमध्ये उत्साहाचे वातावरण पाहायला मिळत आहे.
