दरोडेखोरांचा गावात धुमाकूळ; दोन बंद घरांना केले लक्ष्य, मलकापूर ग्रामीण पोलिसांकडून शोधमोहीम सुरू
बुलढाणा : नांदुरा तालुक्यातील काटी गावात मध्यरात्रीच्या सुमारास सशस्त्र दरोडेखोरांनी धुमाकूळ घातल्याची धक्कादायक घटना घडली आहे. दरोडेखोरांनी एका साडीच्या गोडाऊनसह दोन बंद घरांचे कुलूप तोडून चोरी करण्याचा प्रयत्न केला. या घटनेमुळे परिसरात एकच खळबळ उडाली आहे.
मिळालेल्या माहितीनुसार, रात्री अंदाजे १ ते २ वाजेच्या सुमारास काही सशस्त्र दरोडेखोर काटी गावात दाखल झाले. सुरुवातीला त्यांनी एका साडीच्या गोडाऊनसह एका बंद घराचे कुलूप तोडून चोरी करण्याचा प्रयत्न केला. त्यानंतर दरोडेखोरांनी आणखी एका बंद घराला लक्ष्य केले.
दरम्यान, रायसिंग सिताराम सोलंके यांच्या घरासमोर त्यांचे गुरांचे गोठे आहे. रात्रीच्या सुमारास सोलंके गोठ्यात आले असता त्यांना घरासमोर ३ ते ४ संशयित व्यक्ती आढळून आल्या. संशय आल्याने त्यांनी त्यातील एका व्यक्तीला पकडण्याचा प्रयत्न केला. मात्र, त्याचवेळी दुसऱ्या दरोडेखोराने रायसिंग सिताराम सोलंके यांच्यावर चाकूने हल्ला केला.
या हल्ल्यात सोलंके गंभीर जखमी झाले. त्यानंतर दरोडेखोरांनी घटनास्थळावरून पळ काढला. गंभीर जखमी झालेल्या सोलंके यांचा उपचारादरम्यान अथवा हल्ल्यातच मृत्यू झाल्याची माहिती समोर आली आहे.
घटनेची माहिती मिळताच मलकापूर ग्रामीण पोलिस ठाण्याच्या अंतर्गत असलेले पोलिस पथक तातडीने काटी गावात दाखल झाले. पोलिसांनी घटनास्थळाची पाहणी करून दरोडेखोरांचा शोध सुरू केला आहे.
या घटनेमुळे काटी गावासह परिसरातील नागरिकांमध्ये भीतीचे वातावरण निर्माण झाले असून, दरोडेखोरांना तातडीने अटक करण्याची मागणी होत आहे.
