चाकूर प्रतिनिधी : चाकूर तालुक्यातील घरणी येथे दोन मोटारसायकलींच्या अपघातात एका व्यक्तीचा घटनास्थळीच मृत्यू झाला, तर दुसरा गंभीर जखमी झाला आहे. गंभीर जखमीवर प्राथमिक उपचारासाठी चाकूर येथील ग्रामीण रुग्णालयात उपचार करण्यात आले. त्यानंतर पुढील उपचारासाठी त्याला शासकीय रुग्णालय, लातूर येथे पाठविण्यात आल्याची माहिती मिळाली आहे.
याबाबत मिळालेल्या माहितीनुसार, चाकूर तालुक्यातील लातूर-नांदेड राष्ट्रीय महामार्गावरील घरणी गावाजवळ, ग्रामीण आयटीआयसमोर मोटारसायकल क्रमांक MH 24 BC 9683 आणि MH 55 D 7607 यांची समोरासमोर धडक झाली.
या भीषण अपघातात देविदास सखाराम चव्हाण (वय 50) यांचा घटनास्थळीच मृत्यू झाल्याची प्राथमिक माहिती मिळाली आहे. ते अहमदपूर तालुक्यातील वरवटी तांडा येथील रहिवासी असल्याचे समजते.
तर शेख रहमान गुलाब (वय 22, रा. चाकूर) हे गंभीर जखमी झाले आहेत. अपघाताची माहिती मिळताच पोलीस घटनास्थळी दाखल झाले. जखमी शेख रहमान यांना तातडीने चाकूर येथील ग्रामीण रुग्णालयात दाखल करून प्राथमिक उपचार करण्यात आले. त्यानंतर पुढील उपचारासाठी त्यांना लातूर येथील शासकीय रुग्णालयात हलविण्यात आले आहे.
या घटनेचा पुढील तपास पोलीस करीत आहेत.
