10.86 किमी रेल्वेमार्गाचे दुपदरीकरण; प्रत्येक दिशेने पाच अतिरिक्त प्रवासी गाड्या चालवण्याची क्षमता वाढणार
मुंबई : महाराष्ट्रातील रेल्वे प्रवाशांसह मालवाहतूक क्षेत्रासाठी महत्त्वाची बातमी समोर आली आहे. मध्य रेल्वेच्या चौक-कर्जत रेल्वे विभागातील 10.86 किलोमीटर लांबीच्या दुपदरीकरण प्रकल्पाला भारतीय रेल्वेने मंजुरी दिली आहे. या कामासाठी तब्बल 497 कोटी रुपयांचा खर्च अपेक्षित आहे.
पनवेल-चौक-कर्जत रेल्वे मार्गातील चौक-कर्जत हा महत्त्वाचा टप्पा आहे. सध्या या मार्गावर एकेरी रेल्वे मार्ग असल्याने रेल्वे वाहतुकीच्या क्षमतेवर मर्यादा येत आहेत. दुपदरीकरणाचे काम पूर्ण झाल्यानंतर या मार्गावर अधिक रेल्वेगाड्या चालवणे शक्य होणार असून वाहतुकीची क्षमता वाढण्याची अपेक्षा आहे.
प्रत्येक दिशेने पाच अतिरिक्त प्रवासी गाड्यांची क्षमता
दुपदरीकरण प्रकल्प पूर्ण झाल्यानंतर प्रत्येक दिशेने दररोज पाच अतिरिक्त प्रवासी गाड्या चालवण्याची क्षमता निर्माण होण्याची अपेक्षा आहे. त्यामुळे या मार्गावरून प्रवास करणाऱ्या नागरिकांना रेल्वे सेवांचा विस्तार होण्याचा फायदा मिळू शकतो.
याशिवाय, या प्रकल्पामुळे मालवाहतुकीची क्षमताही लक्षणीय वाढणार आहे. दुपदरीकरणानंतर दरवर्षी 18.35 दशलक्ष टन अतिरिक्त मालवाहतूक हाताळण्याची क्षमता निर्माण होणार आहे. मालगाड्यांना होणारे विलंब आणि मार्गावरील थांबे कमी करण्यासही या प्रकल्पाची मदत होणार आहे.
रेल्वे नेटवर्कची क्षमता वाढवण्यावर भर
भारतीय रेल्वेकडून देशातील रेल्वे नेटवर्कची क्षमता वाढवण्यासाठी विविध पायाभूत सुविधा प्रकल्पांना प्राधान्य दिले जात आहे. यामध्ये दुपदरीकरण, तिपदरीकरण, चौपदरीकरण, उड्डाणपूल तसेच बायपास यांसारख्या कामांचा समावेश आहे.
याच पायाभूत सुविधा विस्ताराचा भाग म्हणून चौक-कर्जत रेल्वे विभागाच्या दुपदरीकरणाला मंजुरी देण्यात आली आहे. प्रकल्प पूर्ण झाल्यानंतर या मार्गाची वाहतूक क्षमता वाढण्याबरोबरच प्रवासी आणि मालवाहतूक अधिक सुरळीत होण्यास मदत होण्याची अपेक्षा आहे.
