२० ते २५ जणांवर गुन्हा दाखल; पाच आरोपींना पोलिसांनी घेतले ताब्यात...?
परभणी (Parbhani Cattle slaughter) : सेलू शहरातील रहेमान नगर भागात गोवंश कत्तलीची कारवाई करण्यासाठी गेलेल्या पोलीस पथकावर जमावाने दगडफेक करून शासकीय कामात अडथळा आणल्याची खळबळजनक घटना रविवार २९ मार्च रोजी सकाळी घडली. याप्रकरणी सेलू पोलीस ठाण्यात सहा नामजद आरोपींसह १५ ते २० अनोळखी लोकांविरुद्ध विविध कलमान्वये गुन्हा दाखल करण्यात आला असून, पाच जणांना पोलिसांनी ताब्यात घेतले आहे.
याबाबत अधिक माहिती अशी की, रविवार २९ मार्च रोजी सकाळी ८:१५ वाजेच्या सुमारास रहेमान नगर येथील नाल्यावरील पत्राच्या शेडमध्ये गोवंश जातीच्या जनावरांची कत्तल केली जात असल्याची माहिती पोलिसांना मिळाली होती. या माहितीवरून सहायक पोलीस निरीक्षक कृष्णा घायवट आणि त्यांच्या पथकाने घटनास्थळी धाव घेतली. पोलीस पथक कारवाई करत असताना, तेथील आरोपींनी बेकायदेशीर जमाव जमवून पोलिसांना कारवाई करण्यापासून रोखले. यावेळी (Parbhani Cattle slaughter) जमावाने पोलीस कर्मचार्‍यांवर दगडफेक केली. इतकेच नव्हे तर, जप्त केलेले अंदाजे १०० किलो गोमांस, कातडी, गोवंशाचे अवशेष आणि कत्तलीसाठी वापरले जाणारे साहित्य (सुर्‍या, कुर्‍हाडी, तराजू) जमावाने पळवून नेले. याद्वारे गुन्ह्याचा पुरावा नष्ट करण्याचा प्रयत्न करण्यात आला असून परिसरात दहशत निर्माण केली गेली. या प्रकरणी सहायक पोलीस निरीक्षक कृष्णा घायवट यांच्या फिर्यादीवरून रज्जाक जैरुद्दीन कुरेशी, मालजी चांद साहब कुरेशी, तला मालजी कुरेशी, मोबीन उर्फ गठुळा मुसा कुरेशी, जावेद नड्डू कुरेशी, सादिक रजाक कुरेशी आणि इतर १५ ते २० जणांविरुद्ध गुन्हा दाखल करण्यात आला आहे.
पोलीस निरीक्षक दीपक बोरसे यांच्या मार्गदर्शनाखाली या प्रकरणाचा पुढील तपास पोलीस उपनिरीक्षक शाकीर शेख करत आहेत. सद्यस्थितीत पोलिसांनी पाच आरोपींना ताब्यात घेतले असून फरार आरोपींचा शोध सुरू आहे.
