जिल्हाधिकार्‍यांचे आदेश; प्रशासनाचा वाळू माफियांवार मोठा दणका
परभणी (Parbhani Illegal sand mining) : जिल्ह्यातील वाळू घाटावर मोठ्या प्रमाणात अवैध वाळू उत्खनन सुरू असल्याचे समोर आल्यानंतर जिल्हाधिकारी संजयसिंह चव्हाण यांनी तात्काळ कठोर कारवाई करत घाट बंद करण्याचे आदेश जारी केले आहेत. संबंधित ठेकेदाराकडून वारंवार मागणी करूनही आवश्यक अभिलेखे, उत्खनन परवानग्या, वाहतूक नोंदी तसेच महसूल संबंधित कागदपत्रे सादर करण्यात आली नसल्याचे तपासात उघड झाले. त्यामुळे जिल्हाधिकारी यांनी नियमभंगाची गंभीर दखल घेत ही कारवाई केली.
मिळालेल्या माहितीनुसार, महसूल विभाग व खनिकर्म विभागाच्या अधिकार्‍यांनी संयुक्त तपासणी केली असता घाट परिसरात मंजूर क्षमतेपेक्षा अधिक प्रमाणात वाळू उपसा सुरू असल्याचे निदर्शनास आले. काही ठिकाणी नदीपात्रात मोठे खड्डे पडल्याचेही आढळून आले. यामुळे (Parbhani Illegal sand mining) पर्यावरणीय समतोल धोक्यात येण्याची शक्यता व्यक्त करण्यात आली आहे. तपासणा दरम्यान संबंधित घाट चालकांकडे आवश्यक कागदपत्रांची मागणी करण्यात आली होती. मात्र, वेळोवेळी सूचना देऊनही संपूर्ण अभिलेखे सादर करण्यात आले नाहीत.
यामुळे शासन नियमांचे उल्लंघन झाल्याचे स्पष्ट झाल्यानंतर जिल्हाधिकार्‍यांनी वाळू घाट तात्काळ बंद करण्याचे आदेश दिले. तसेच पुढील चौकशी पूर्ण होईपर्यंत कोणत्याही प्रकारचे उत्खनन व वाहतूक न करण्याचे निर्देश दिले आहेत. या कारवाईमुळे अवैध वाळू व्यवसायाशी संबंधितांमध्ये मोठी खळबळ उडाली असून महसूल विभागाने घाट परिसरावर लक्ष ठेवण्यासाठी विशेष पथके नियुक्त केली आहेत. नियमांचे उल्लंघन करून वाळू वाहतूक करणार्‍या वाहनांवरही कारवाई करण्यात येणार असल्याचे प्रशासनाकडून सांगण्यात आले.
स्थानिक नागरिकांनी प्रशासनाच्या या निर्णयाचे स्वागत केले आहे. (Parbhani Illegal sand mining) अवैध वाळू उत्खननामुळे नदीपात्राचे मोठे नुकसान होत असून भूजल पातळी कमी होणे, शेतीला धोका निर्माण होऊन तसेच पावसाळ्यात पूरस्थितीचा धोका यासारख्या समस्या निर्माण होत असल्याची भावना ग्रामस्थांनी व्यक्त केली. संबंधित वाळू घाटावरील पुढील कार्यवाही पूर्ण होईपर्यंत उत्खनन व वाहतूक पूर्णपणे बंद राहणार असल्याचे प्रशासनाने स्पष्ट केले आहे. जिल्ह्यात कुठेही नियमबाह्य वाळू उत्खनन आढळल्यास संबंधितांवर कठोर कारवाई केली जाईल असा स्पष्ट इशारा जिल्हाधिकारी संजयसिंह चव्हाण यांनी दिला आहे.
