चिखलमय रस्त्यामुळे शेतीची कामे ठप्प; जनावरे चारायला नेण्यासही अडचण
मानोरा : तालुक्यातील कोंडोली शिवारातील श्री पितांबर महाराज मंदिरासमोरील एकलारा रस्तालगत असलेला गायरान पांदण रस्ता पावसाळ्यात अक्षरशः चिखलमय आणि दुष्कर बनला आहे. रस्त्यावर ३ ते ४ फूट पाणी साचत असल्याने शेतकरी, शेतमजूर आणि पशुपालक वर्गाला मोठ्या समस्यांना तोंड द्यावे लागत आहे.
कोंडोली शिवारातील हा मुख्य पांदण रस्ता असल्याने गावातील सर्व शेतकऱ्यांना शेतात जाण्यासाठी याच मार्गाचा वापर करावा लागतो. गाई, म्हशी, शेळ्या यांना दररोज चारण्यासाठी नेण्यासाठीदेखील याच रस्त्याचा आधार घ्यावा लागतो. मात्र, सध्या रस्त्याची अवस्था अत्यंत बिकट झाली आहे.
पावसाळ्यात रस्ता खराब असल्याने शेतकऱ्यांना शेतीसाठी लागणारी खते, बियाणे, फवारणी यंत्रे आणि इतर साहित्य शेतात नेण्यास मोठा अडथळा निर्माण झाला आहे. बैलजोडी आणि ट्रॅक्टर शेतात नेता येत नसल्याने मशागत, पेरणी आणि फवारणीची कामे रखडली आहेत. त्यामुळे उत्पादन घटण्याची भीती शेतकऱ्यांना वाटत आहे.
शेतमजूरांनाही कामावर ये-जा करताना प्रचंड मानसिक आणि शारीरिक त्रास सहन करावा लागत आहे. पांदण रस्त्याची दुरवस्था झाल्याने शेतीची कामे तसेच जनावरांना चारण्यासाठी नेण्याचा प्रश्न गंभीर बनला आहे.
कोंडोली येथील शेतकरी आणि शेतमजुरांनी ही समस्या अनेकदा मतदारसंघातील लोकप्रतिनिधींकडे मांडून पाठपुरावा केला आहे. मात्र, कोणत्याही पक्षाच्या लोकप्रतिनिधीने कोंडोली शिवारातील पांदण रस्त्याकडे लक्ष दिलेले नाही. त्यामुळे शेतकऱ्यांमध्ये तीव्र संताप व्यक्त होत आहे.
शिवारातील पांदण रस्त्याची तातडीने डागडुजी व दुरुस्ती करण्यात यावी, तसेच रस्त्याचे खडीकरण व मुरमीकरण करून शेतकऱ्यांना दिलासा द्यावा, अशी मागणी होत आहे. पांदण रस्त्याच्या दुरवस्थेमुळे शेती आणि जनावरांच्या चारण्याचा प्रश्न ऐरणीवर आला असून, प्रशासनाने याकडे गांभीर्याने लक्ष देण्याची मागणी शेतकरी व शेतमजुरांकडून होत आहे.
