भाजपा जिल्हा उपाध्यक्ष डॉ. प्रणय खुणे यांच्या मागणीची जिल्हा परिषद गडचिरोलीकडून दखल
घोट : रेगडी, हळदवाही व जिल्हा परिषद क्षेत्रातील नवनीत ग्राम पहाडी येथे श्री गुरुदेव सेवा मंडळाच्या नवनीत ग्राम शाखेच्या वतीने आयोजित कार्यक्रमात अध्यक्ष डॉ. प्रणय भाऊ खुणे, प्रमुख पाहुणे मानवाधिकार संघटनेचे जिल्हाध्यक्ष रमेश अधिकारी, जिल्हा उपाध्यक्ष नानु भाऊ उपाध्ये, विदर्भ केसरी वृत्तपत्राचे जिल्हा प्रतिनिधी फुलचंद वाघाडे, दिनेश मुजुमदार, संदीप भोवरे, प्रवीण गेडाम, पलाश घरामी, रमेश लेकलवार तसेच पदाधिकारी उपस्थित होते.
यावेळी अध्यक्ष डॉ. प्रणय भाऊ खुणे यांनी मार्गदर्शन करताना राष्ट्रसंत तुकडोजी महाराज यांच्या विचारांना पुढे नेण्यासाठी प्रत्येकाने पुढे सरसावले पाहिजे, तसेच राष्ट्रसंतांच्या विचारांची आज देशाला गरज आहे, असे सांगितले.
यावेळी गुरुदेव भक्त व आयोजकांनी येथील विविध समस्या मांडल्या. नवनीत ग्राम पहाडीच्या सर्वांगीण विकासासाठी भारतीय जनता पार्टी कटिबद्ध आहे, असे प्रतिपादन डॉ. प्रणय भाऊ खुणे यांनी केले. तसेच या पर्यटनस्थळाला सर्वप्रथम ‘क’ वर्ग दर्जा मिळणे गरजेचे असल्याचे त्यांनी सांगितले.
यानंतर श्री गुरुदेव भक्तांसोबत डॉ. प्रणय भाऊ खुणे यांनी पहाडीची पाहणी करून येथील सोयी-सुविधांचा आढावा घेतला. तसेच येथील विकासाबाबत गडचिरोली विधानसभा मतदारसंघाचे आमदार डॉ. मिलिंद भाऊ नरोटे व वनपरिक्षेत्राधिकारी वाडीघरे साहेब यांच्यासोबत भ्रमणध्वनीवरून सविस्तर चर्चा केली.
यावेळी डॉ. प्रणय खुणे यांच्या हस्ते राष्ट्रसंत तुकडोजी महाराज यांच्या पुतळ्याच्या जागेचे उद्घाटन करण्यात आले होते. त्या ठिकाणी राष्ट्रसंत तुकडोजी महाराज यांच्या पुतळ्याची स्थापना करण्यात आलेली आहे. डॉ. प्रणय खुणे यांच्या मागणीवरून आमदार मिलिंद भाऊ नरोटे यांनी या ठिकाणी बोअरवेलची मंजुरीसुद्धा दिलेली आहे.
नुकतीच डॉ. प्रणय खुणे यांनी नवनीत ग्राम पहाडी येथील विकासासाठी जिल्हा परिषद गडचिरोलीकडे मागणी केली होती. या मागणीची दखल जिल्हा परिषद गडचिरोलीने घेतली असून, तसे पत्र पंचायत समिती चामोर्शी यांनाही पाठविण्यात आले आहे.
यावेळी श्री गुरुदेव सेवा मंडळाचे विश्वस्त नोनीगोपाल हलदर तसेच नवनीत ग्राम पहाडी व ग्रामपंचायत हळदवाही अंतर्गत विविध गावांतील गुरुदेव भक्त मोठ्या संख्येने उपस्थित होते.
