स्वीकृत नगरसेवक निवडीवरून वाद चिघळला; आमदार कुमार आयलानी आणि जिल्हाध्यक्ष राजेश वधारिया यांची आक्रमक भूमिका
उल्हासनगर : उल्हासनगर महापालिकेतील सत्तेच्या वाटपावरून भाजप आणि शिवसेनेमधील मतभेद पुन्हा उफाळून आले आहेत. स्वीकृत नगरसेवकांच्या निवडीवरून निर्माण झालेल्या वादानंतर भाजपने उल्हासनगर महापालिकेतील सत्तेतून बाहेर पडण्याचा निर्णय घेतला आहे. तसेच आगामी निवडणुकांमध्ये खासदार श्रीकांत शिंदे यांना सहकार्य न करण्याची भूमिका पक्षाने जाहीर केली आहे.
महापालिकेतील सात स्वीकृत नगरसेवकांच्या निवडीमध्ये भाजपने चार जागांचा दावा केला होता. मात्र अंतिम निवडीत शिवसेनेचे पाच आणि भाजपचे दोन उमेदवार निवडले गेले. भाजपच्या दोन उमेदवारांचे अर्ज छाननीदरम्यान बाद झाल्यानंतर हा वाद अधिक तीव्र झाला. भाजपने या प्रक्रियेवर आक्षेप घेत न्यायालयीन मार्ग अवलंबण्याची भूमिका घेतली आहे.
या पार्श्वभूमीवर आमदार कुमार आयलानी आणि भाजप जिल्हाध्यक्ष राजेश वधारिया यांनी पत्रकार परिषद घेत पक्षाची भूमिका स्पष्ट केली. स्वीकृत नगरसेवकांच्या निवडीत शिवसेनेकडून राजकीय खेळी करण्यात आल्याचा आरोप भाजप नेत्यांनी केला. यावेळी महापौरांचे पती कमलेश निकम यांच्यावरही भाजप नेत्यांनी टीका केली. त्यामुळे उल्हासनगरमधील भाजप-शिवसेना संबंधांमधील तणाव आणखी वाढल्याचे दिसून येत आहे.
दरम्यान, भाजपचे उल्हासनगरचे आमदार कुमार आयलानी यांनी पक्षाच्या सर्व 37 नगरसेवकांसह वरिष्ठ पदाधिकाऱ्यांची विशेष बैठक घेतली. या बैठकीत महापालिकेतील सत्तेतून बाहेर पडण्याचा निर्णय घेण्यात आला. भाजपचे नगरसेवक आता शिवसेनेच्या विरोधात भूमिका घेणार असल्याचेही पक्षाकडून स्पष्ट करण्यात आले आहे.
या बैठकीत स्वीकृत नगरसेवकांच्या निवडीवरून भाजपला झालेल्या धक्क्याचा संदर्भ देत आगामी लोकसभा निवडणुकीत शिवसेनेचे खासदार श्रीकांत शिंदे यांच्यासाठी भाजप कार्यकर्ते आणि नगरसेवक काम करणार का, असा सवाल कुमार आयलानी यांनी उपस्थित केला. त्यानंतर बैठकीतील सर्व नगरसेवकांनी हात वर करून श्रीकांत शिंदे यांच्या प्रचारात सहभागी न होण्याची भूमिका व्यक्त केली.
स्वीकृत नगरसेवकांच्या निवडीवरून झालेल्या या वादामुळे उल्हासनगर महापालिकेतील स्थानिक सत्तासमीकरणावर परिणाम झाला आहे. भाजपने स्थानिक पातळीवरील युतीतून बाहेर पडण्याची घोषणा केल्याने शिवसेना आणि भाजपमधील संघर्ष आता उघडपणे समोर आला आहे.
