सकाळी ६.३० वाजता घराबाहेर पडतो, रात्री ११ वाजता परततो; कमी पगारामुळे PG शक्य नसल्याने सहा दिवस लोकल प्रवासाचीच धावपळ
मुंबईत घर घेण्याच्या वाढत्या खर्चामुळे शहराबाहेर राहण्याचा पर्याय स्वीकारणाऱ्या मध्यमवर्गीयांसाठी रोजचा लोकल प्रवास हा आयुष्याचा अविभाज्य भाग बनला आहे. वसई-विरार, बदलापूर-कर्जत यांसारख्या भागांत राहून मुंबईत नोकरी करणाऱ्या अनेकांना दररोज तासन्‌तास प्रवास करावा लागतो. अशाच दैनंदिन संघर्षाची कहाणी सांगणारी एका मुंबईकराची पोस्ट सध्या सोशल मीडियावर चर्चेत आली आहे.
ही पोस्ट r/mumbai या Reddit पेजवर underground-chicken या अकाउंटवरून शेअर करण्यात आली आहे. संबंधित युजर दररोज बदलापूर ते गोरेगाव असा प्रवास करत असून, नोकरी आणि घर यामधील बहुतांश वेळ प्रवासातच जात असल्याचे त्याने सांगितले आहे.
युजरच्या माहितीनुसार, त्याचा दिवस पहाटेच सुरू होतो. सकाळी ५ वाजता उठल्यानंतर ६.३० वाजता तो घरातून बाहेर पडतो आणि ७.१५ ची लोकल पकडतो. बदलापूरहून दादरपर्यंत रेल्वेने आल्यानंतर तो गोरेगावच्या दिशेने जाण्यासाठी पश्चिम रेल्वे मार्गावरील बोरिवली ट्रेनचा पर्याय घेतो.
मात्र रेल्वे प्रवास संपल्यानंतरही कार्यालयापर्यंत पोहोचण्यासाठी त्याला आणखी प्रतीक्षा करावी लागते. गोरेगावला उतरल्यावर शेअर रिक्षासाठी तब्बल ३० मिनिटे रांगेत उभे राहावे लागते. या संपूर्ण प्रवासानंतर तो साधारण सकाळी १० वाजता ऑफिसमध्ये पोहोचतो.
दिवसभराचे काम संपल्यानंतर पुन्हा याच मार्गाचा उलटा प्रवास सुरू होतो. ऑफिसमधून बाहेर पडल्यानंतर बदलापूर गाठेपर्यंत रात्रीचे ११ वाजतात. म्हणजेच घरातून निघाल्यापासून परत घरी येईपर्यंत दिवसातील मोठा हिस्सा प्रवासातच खर्च होतो.
विशेष म्हणजे, रविवार वगळता आठवड्यातील सहाही दिवस हीच दिनचर्या सुरू असल्याचे या युजरने सांगितले आहे. कमी पगारामुळे गोरेगाव किंवा कार्यालयाजवळ PGमध्ये राहण्याचा पर्यायही त्याच्यासाठी शक्य नसल्याचे त्याने स्पष्ट केले.
या परिस्थितीचे वर्णन करताना त्याने आपले संपूर्ण आयुष्य नोकरी आणि प्रवासाभोवतीच फिरत असल्याची भावना व्यक्त केली आहे. घरी परतल्यानंतर विश्रांती किंवा कुटुंबासाठी वेळ देण्याऐवजी दुसऱ्या दिवशी पुन्हा पहाटे उठण्याची तयारी करावी लागते. त्यामुळे घर हे जणू केवळ झोपण्यासाठी उरल्याची भावना त्याच्या पोस्टमधून व्यक्त झाली आहे.
मुंबईतील वाढते रिअल इस्टेट दर आणि घरांच्या किमतीमुळे शहरात राहणे अनेक मध्यमवर्गीयांसाठी आर्थिकदृष्ट्या कठीण होत आहे. त्यामुळे नोकरी मुंबईत आणि घर शहराबाहेर, अशी परिस्थिती मोठ्या संख्येने नागरिक स्वीकारत आहेत. परिणामी रोजचा लांब पल्ल्याचा लोकल प्रवास त्यांच्या जीवनशैलीचा भाग बनला आहे.
या Reddit पोस्टनंतर अनेक नेटकऱ्यांनी प्रतिक्रिया देत आपणही अशाच प्रकारच्या दैनंदिन प्रवासाचा अनुभव घेत असल्याचे सांगितले. मुंबईतील नोकरीच्या संधी आणि शहराबाहेरील तुलनेने परवडणारी घरे यांच्यातील अंतरामुळे निर्माण होणाऱ्या या प्रवासाच्या ताणावरून पुन्हा एकदा चर्चा सुरू झाली आहे.
