बुलढाणा–काशी पोहरादेवी बससेवा सुरू

गणेश चतुर्थीपासून मुक्काम बससेवा; भाविकांची प्रवासाची गैरसोय दूर होणार

मानोरा : गणेश चतुर्थीच्या पर्वावर बुलढाणा ते काशी पोहरादेवी अशी बससेवा सुरू करण्यात आली आहे. गणेश महाराज पोहरादेवी यांच्या पाठपुराव्याने, आगार व्यवस्थापक कल्पना शिरसाठ व विभागीय सचिव शंकर जाधव यांच्या सहकार्याने ही एसटी बससेवा सुरू झाली आहे. त्यामुळे बुलढाणा परिसरातील भाविकांना काशी पोहरादेवी येथे ये-जा करणे सोयीचे झाले आहे.

देशभरातील बंजारा समाजाचे श्रद्धास्थान असलेल्या काशी पोहरादेवी येथे गुरुपौर्णिमा, रामनवमी, दसरा, घटस्थापना आदी सण-उत्सवांच्या काळात भाविकांची मोठी गर्दी होते. यावेळी भाविकांना प्रवासासह विविध गैरसोयींचा सामना करावा लागतो. नंगारा भवन ही कल्पक व ऐतिहासिक वास्तू केंद्रस्थानी आल्यानंतर काशी पोहरादेवी येथे भाविकांसह पर्यटकांचीही मोठ्या प्रमाणात गर्दी होत आहे. त्यामुळे महामंडळाने प्रत्येक जिल्ह्यातून काशी पोहरादेवीसाठी एसटी बससेवा सुरू करणे गरजेचे असल्याची मागणी होत आहे.

मागील पंधरा वर्षांपासून कर्नाटक राज्यातील चिंचोली–पोहरादेवी, तसेच बीड जिल्ह्यातील गेवराई–पोहरादेवी बससेवा सुरू आहे. मुंबई-कल्याण–पोहरादेवी ही बस मागील वर्षभरापासून वाशिमपर्यंत धावत असल्याने पुढील प्रवासासाठी भाविकांची गैरसोय होत आहे. पंढरपूर, सोलापूर, धाराशिव, लातूर, नागपूर, रत्नागिरी, अमरावती आदी ठिकाणांहूनही एसटी बससेवा सुरू करणे गरजेचे असल्याचे सांगण्यात आले.

याडी मरीयामा, संत सेवालाल महाराज, याडी सामकी माता तसेच महान तपस्वी संत डॉ. रामराव महाराज यांचे समाधीस्थळ असलेल्या बंजारा समाजाच्या काशी तीर्थक्षेत्राला ये-जा करण्यासाठी बुलढाणा ते पोहरादेवी ही मुक्काम बससेवा गणेश चतुर्थीच्या दिवशी, २५ सप्टेंबरपासून सुरू करण्यात आली आहे.

ही बस बुलढाणा येथून वरवंड, डोंगरखंडाळा, करवंड, उदयनगर, चिंचपूर, लाखनवाडा, आंबेटाकळी, पळशी, बाळापूर, वाडेगाव, पातूर, मेडशी, मालेगाव, वाशिम, धानोरा मार्गे पोहरादेवी येथे नियमित मुक्कामी राहणार आहे.

पोहरादेवीत एसटी डेपोची मागणी

पोहरादेवी येथे एसटी बस डेपोची निर्मिती करून बसस्थानकावर आवश्यक सोयी-सुविधा उपलब्ध करून द्याव्यात. तसेच नागपूर–नांदेड धावणाऱ्या एसटी बसेस पोहरादेवी मार्गे वळवून आंध्र प्रदेश, कर्नाटक, तेलंगणा, राजस्थान, मध्य प्रदेश आदी राज्यांतूनही येथे बससेवा सुरू करणे गरजेचे आहे.

नंगारा भवन ही वास्तू पर्यटकांना तसेच बंजारा समाजाच्या रूढी-परंपरांचे दर्शन घडविणारे महत्त्वाचे केंद्र बनत आहे. ही वास्तू पाहण्यासाठी भाविक व पर्यटकांची संख्या दिवसागणिक वाढत असल्याने येथे दळणवळणाच्या सुविधा उपलब्ध होणे गरजेचे असल्याची प्रतिक्रिया शेतकरी नेते मनोहर राठोड यांनी व्यक्त केली.