नागपूर (MNLU Nagpur) : नागपूरमध्ये हृदयद्रावक घटना घडली असून महाराष्ट्र नॅशनल लॉ युनिव्हर्सिटी (MNLU) नागपूर येथील दोन तरुण विद्यार्थ्यांचा भीषण अपघातात मृत्यू झाला आहे. या घटनेमुळे कुटुंबीयांवर दुःखाचा डोंगर कोसळला असून कॅम्पसमध्ये शोककळा पसरली आहे.
मृत विद्यार्थ्यांची नावे आर्यन रविंद्र सोनटक्के (वय २१, यवतमाळ) आणि सक्षम विनोद बनसोड (वय २१, नागपूर) अशी आहेत. दोघेही MNLU नागपूरमध्ये तृतीय वर्षात शिक्षण घेत होते.
मिळालेल्या माहितीनुसार, बुधवारी दुपारी सुमारे ३:३० वाजता दोघेही दुचाकीने हॉस्टेलमधून बाहेर गेले होते. त्यांनी वार्डा रोडवरील एका ढाब्यावर वेळ घालवला आणि रात्री सुमारे ११ वाजता परतीचा प्रवास सुरू केला.
परंतु विद्यापीठापासून अवघ्या ४०० मीटर अंतरावर, मौजा वारणगा टोलीकडे जाणाऱ्या वळणाजवळ त्यांची दुचाकी वेगावर नियंत्रण सुटल्याने रस्त्यालगतच्या खड्ड्यात कोसळली. हा परिसर अत्यंत निर्जन असल्याने कुणालाही अपघाताची माहिती तत्काळ मिळाली नाही. दोघांनाही गंभीर डोक्याला आणि शरीराला इजा होऊन जागीच मृत्यू झाला.
गुरुवारी सकाळी वाटसरूंना रस्त्यालगत अपघातग्रस्त दुचाकी आणि मृतदेह आढळल्यानंतर पोलिसांना माहिती देण्यात आली. बुटीबोरी पोलीस घटनास्थळी दाखल झाले, पंचनामा करून मृतदेह शवविच्छेदनासाठी पाठवण्यात आले.
तपासादरम्यान पोलिसांनी त्यांचा शेवटचा प्रवास रोहित डिलक्स ढाबा, वर्धा रोड येथे झाल्याचे स्पष्ट केले आहे. ढाब्यावरील सीसीटीव्हीमध्ये दोघेही रात्री सुमारे ११ वाजता तेथून निघताना दिसत असून, आर्यन वेगाने दुचाकी चालवत असल्याची माहिती समोर आली आहे.
आर्यन सोनटक्के हा यवतमाळ येथील ज्येष्ठ वकिलांचा मुलगा असून सक्ष्म बन्सोड हा वर्धा येथील अतिरिक्त दिवाणी न्यायाधीशांचा पुत्र होता. दोन्ही कुटुंबे न्यायव्यवस्थेशी जोडलेली असून या दुर्घटनेमुळे त्यांच्यावर प्रचंड आघात झाला आहे.
ही घटना केवळ अपघात नसून, क्षणिक वेग, अंधार आणि एक चुकीचा वळण यामुळे आयुष्य कसे बदलू शकते याची वेदनादायी आठवण करून देणारी ठरली आहे.
