केंद्रीय शिक्षणमंत्र्यांच्या राजीनाम्यासह विविध मागण्यांचे निवेदन!
मानोरा (NEET paper leak case) : देशभरात नीट, जी, यूपीएससी सह विविध स्पर्धा परीक्षांमधील पेपरफुटीच्या घटनांमुळे विद्यार्थ्यांमध्ये निर्माण झालेल्या असंतोषाच्या पार्श्वभूमीवर, मानोरा तालुक्यातील विद्यार्थ्यांनी तहसील कार्यालयावर शांततापूर्ण रॅली काढून प्रशासनाला निवेदन दिले. त्या रॅलीला मनसेने समर्थन देत केंद्रीय मंत्री धर्मेंद्र प्रधान यांच्या राजीनाम्यासह विविध मागण्यांचे निवेदन दि. २० जुलै रोजी तहसीलदार राजेंद्र पाटील यांच्यामार्फत महामहीम राष्ट्रपती यांना पाठविले.
महामहीम राष्ट्रपती यांना पाठविलेल्या निवेदनात नमूद केले आहे की, समाजसेवक सोनम वांगचुक यांनी उपस्थित केलेल्या राष्ट्रीय महत्त्वाच्या मुद्द्यांना पाठिंबा देत, केंद्र सरकारने गांभीर्याने लक्ष द्यावे, पेपरफुटी प्रकरणांची नैतिक जबाबदारी स्वीकारून केंद्रीय शिक्षण मंत्र्यांनी राजीनामा द्यावा, नीट, जेईई, युजीसी-नेट, टीईटी, आयबीपीएस व इतर पेपरफुटी प्रकरणांची निष्पक्ष व उच्चस्तरीय चौकशी करून दोषींवर कठोर कारवाई करावी, एमपीएससी तसेच महाराष्ट्रातील सर्व स्पर्धा परीक्षा ऑफलाईन, सुरक्षित व पारदर्शक पद्धतीने घेण्यात याव्यात, पेपरफुटी रोखण्यासाठी कठोर कायदा व सक्षम सुरक्षा यंत्रणा लागू करावी.
शिक्षण व्यवस्थेतील पारदर्शकतेसाठी आणि विद्यार्थ्यांच्या भविष्यासाठी शासनाने आमच्या मागण्यांचा तातडीने विचार करून योग्य ती कार्यवाही करावी, अशी पाठविलेल्या विनंती निवेदनाद्वारे करण्यात आली आहे. अन्यथा मनसे स्टाईलने आंदोलन तीव्र करण्याचा इशाराही दिला आहे. (NEET paper leak case) निवेदन देतेवेळी मनसेचे तालुका अध्यक्ष संतोष घोडे, तालुका उपाध्यक्ष देवा बारसे, शहर अध्यक्ष महादेव भस्मे, सामाजिक कार्यकर्ता सुशांत खडसे, विशाल ठाकरे, गोपाल चव्हाण, शाम पवार, चेतन पवार आदीसह इतरांची उपस्थिती होती.
