पाथरीच्या आनंदनगर तांडा येथील जिल्हा परिषद शाळेचा प्रश्न
लेखी आश्वासनानंतर आंदोलन स्थगित
परभणी (Zilla Parishad School) : पाथरी तालुक्यातील आनंदनगर तांडा येथील जिल्हा परिषदेच्या प्राथमिक शाळेत मागील दोन महिन्यांपासून शिक्षक उपलब्ध नसल्याने विद्यार्थ्यांच्या शिक्षणाचा प्रश्न निर्माण झाला आहे. यासंदर्भात वारंवार पाठपुरावा करूनही शिक्षण विभागाकडून शिक्षकाची नियुक्ती करण्यात न आल्याने संतप्त विद्यार्थ्यांनी सोमवारी सकाळी साडेअकराच्या सुमारास पाथरी येथील गटशिक्षणाधिकारी कार्यालयातच शाळा भरवत आंदोलन केले.
आनंदनगर तांडा येथील (Zilla Parishad School) जिल्हा परिषद प्राथमिक शाळेत दोन शिक्षक कार्यरत होते. त्यापैकी एका शिक्षकाची बदली झाली असून दुसरे शिक्षक एसआयआरच्या कामात व्यस्त असल्याने विद्यार्थ्यांच्या अध्यापनावर परिणाम होत आहे. त्यामुळे गेल्या दोन महिन्यांपासून नियमित अध्यापनाचा प्रश्न निर्माण झाला होता. शिक्षक उपलब्ध करून देण्याची मागणी ग्रामस्थ व पालकांकडून वारंवार करण्यात आली होती. परंतु त्याची दखल घेतली जात नसल्याने विद्यार्थ्यांनी थेट गटशिक्षणाधिकारी कार्यालयात येऊन शाळा भरवत आंदोलन केले.
दरम्यान गटविकास अधिकारी ऋषिकेश सावंत यांनी आंदोलनकर्ते विद्यार्थी व आनंदनगर तांडा येथील ग्रामस्थांची भेट घेऊन त्यांच्याशी चर्चा केली. (Zilla Parishad School) विद्यार्थ्यांच्या शिक्षणाचा प्रश्न तातडीने सोडविण्याबाबत मागणी मान्य करण्यात येत असल्याचे लेखी पत्र त्यांनी दिले. यावेळी गटशिक्षणाधिकारी मुकेश राठोड उपस्थित होते. लेखी आश्वासन मिळाल्यानंतर विद्यार्थ्यांनी आंदोलन स्थगित केले.
यावेळी आनंदनगर तांडा येथील माजी सरपंच विजय पवार, उपसरपंच अनिल राठोड, तंटामुक्ती समितीचे अध्यक्ष गोविंद पवार, शाळा व्यवस्थापन समितीचे अध्यक्ष सुनील पवार यांच्यासह ग्रामस्थ उपस्थित होते.
