शाळकरी मुलींचे मानव विकास बससाठी ढोल बजाव आंदोलन

हिंगोली (School Girls Protest) : सेनगाव तालुक्यातील साखरा केंद्रांतर्गत येणार्‍या अनेक गावांतील शाळकरी मुला-मुलींना शाळेत येण्यासाठी वारंवार मागणी करूनही मानव विकास बस उपलब्ध होत नसल्याच्या निषेधार्थ अखेर विद्यार्थ्यांनी शिक्षण विभागासमोर ढोल बजाव आंदोलन करून लक्ष वेधले. साखरा येथे केंद्रीय जिल्हा परिषद शाळा, तसेच इतर खाजगी शाळा व महाविद्यालये आहेत. या परिसरातील बोरखेडी (पिं.), बोरखेडा तांडा, साखरा तांडा यासह इतर गावांतील विद्यार्थी शिक्षणासाठी साखरा येथे ये-जा करतात. काही विद्यार्थी सायकलवर, तर काही पायी चालत शाळा गाठतात.

राज्य शासनाने शिक्षण सक्तीचे व मोफत केले असून शिक्षणाचा दर्जा वाढावा यासाठी अनेक कल्याणकारी योजना राबविल्या जात आहेत. विशेषतः मुलींना शिक्षणाच्या प्रवाहात आणण्यासाठी शासन सर्वतोपरी प्रयत्न करत आहे. मात्र परिवहन विभाग या विद्यार्थ्यांच्या मागणीकडे दुर्लक्ष करत आहे.सध्या पावसाळ्याचे दिवस असून रस्त्यावर चिखल व मोठ्या प्रमाणात गवत वाढले आहे. त्यामुळे विद्यार्थ्यांना शाळेत ये-जा करताना मोठा धोका पत्करावा लागत आहे. यामुळे विद्यार्थ्यांच्या जीवितास धोका निर्माण झाला आहे. या पार्श्वभूमीवर शाळेच्या मुख्याध्यापकांनी विद्यार्थ्यांच्या सुरक्षित प्रवासासाठी हिंगोली व सेनगाव परिवहन विभागाकडे मानव विकास मिशनची बस उपलब्ध करून देण्याची मागणी अनेक दिवसांपासून केली होती.

मात्र या मागणीकडे दुर्लक्ष झाल्याने अखेर पालकांनी व माजी जिल्हा परिषद सदस्य, शिवसेना नेते राजेंद्र मोरे यांच्या नेतृत्वाखाली शाळकरी मुला-मुलींसह सेनगाव पंचायत समितीच्या शिक्षण विभागासमोर ढोल बजाव आंदोलन केले.आम्हाला मानव विकासची बस उपलब्ध करून द्या, अशी आर्त हाक यावेळी विद्यार्थी व पालकांनी दिली.