शिक्षक नियुक्तीवरून मिसाळवाडीत वाद चिघळला; शाळा व्यवस्थापन समिती आणि ग्रामस्थांनी शाळेला ठोकले कुलूप

सहशिक्षक अनिल सुरेश दांडगे यांच्या नियुक्तीला विरोध; प्रशासनाने निर्णय न बदलल्यास मंगळवारी जिल्हा परिषद CEO कार्यालयासमोर आंदोलनाचा इशारा

चिखली : तालुक्यातील मिसाळवाडी येथील जिल्हा परिषद प्राथमिक शाळेतील सहशिक्षक अनिल सुरेश दांडगे यांच्या नियुक्तीवरून ग्रामस्थ आणि प्रशासनामध्ये वाद निर्माण झाला आहे. दांडगे यांच्या नियुक्तीला शाळा व्यवस्थापन समिती, ग्रामपंचायत तसेच ग्रामस्थांचा विरोध असतानाही नियुक्ती कायम ठेवण्यात आल्याने पालक आणि ग्रामस्थांनी शनिवारी, १९ सप्टेंबर २०२६ रोजी शाळेला कुलूप ठोकत आंदोलन केले.

नियुक्तीला पूर्वीपासूनच विरोध

अनिल सुरेश दांडगे यांची मिसाळवाडी जिल्हा परिषद प्राथमिक शाळेत सहशिक्षक म्हणून नियुक्ती करू नये, अशी मागणी ग्रामपंचायत, शाळा व्यवस्थापन समिती आणि ग्रामस्थांच्या वतीने करण्यात आली होती. यासंदर्भात जिल्हा परिषदेचे मुख्य कार्यकारी अधिकारी गुलाबराव खरात यांना पूर्वसूचना देत निवेदनही सादर करण्यात आले होते.

गावात अन्य होतकरू शिक्षकाची नियुक्ती करण्यात यावी, अशी भूमिका निवेदनातून मांडण्यात आली होती. तसेच दांडगे यांची नियुक्ती झाल्यास आंदोलन करण्यात येईल, असा इशाराही ग्रामस्थांनी दिला होता. मात्र, या निवेदनाची दखल न घेत प्रशासनाकडून दांडगे यांची नियुक्ती करण्यात आल्याचा आरोप ग्रामस्थांनी केला आहे.

राजकीय दबावाचा ग्रामस्थांचा आरोप

नियुक्तीमागे राजकीय दबाव असल्याचा दावा ग्रामस्थांकडून करण्यात आला आहे. तसेच शाळेचे मुख्याध्यापक आणि शाळा व्यवस्थापन समितीच्या अध्यक्षांवर दबाव आणून दांडगे यांना सेवेत रुजू करून घेण्यास सांगण्यात आल्याचा आरोपही ग्रामस्थांनी केला आहे.

प्रार्थनेनंतर शाळेला कुलूप

दांडगे यांच्या नियुक्तीची माहिती समोर आल्यानंतर पालक आणि शाळा व्यवस्थापन समितीचे सदस्य आक्रमक झाले. शनिवारी सकाळी शाळेतील प्रार्थना झाल्यानंतर पालक, समितीचे सदस्य आणि ग्रामस्थांनी एकत्र येत शाळेला कुलूप ठोकले.

प्रशासनाने येत्या सोमवारपर्यंत या नियुक्तीबाबत योग्य निर्णय घ्यावा, अशी मागणी आंदोलनकर्त्यांनी केली आहे. अन्यथा मंगळवारी बुलढाणा जिल्हा परिषदेचे मुख्य कार्यकारी अधिकारी गुलाबराव खरात यांच्या दालनासमोर तीव्र आंदोलन करण्याचा इशारा शाळा व्यवस्थापन समिती आणि ग्रामस्थांनी दिला आहे.

ग्रामपंचायत पदाधिकाऱ्यांसह ग्रामस्थांच्या सह्या

या संदर्भातील निवेदनावर ग्रामपंचायतीचे सरपंच विनोद लक्ष्मण मिसाळ, उपसरपंच हनुमान मधुकर मिसाळ, पोलीस पाटील रवी तुकाराम मिसाळ, शाळा व्यवस्थापन समितीचे अध्यक्ष लक्ष्मण संजय भगत यांच्यासह अनेक ग्रामस्थांच्या सह्या आहेत.

आता सोमवारी प्रशासनाकडून या नियुक्तीबाबत कोणती भूमिका घेतली जाते, याकडे मिसाळवाडी ग्रामस्थांसह तालुक्यातील शिक्षण विभागाचे लक्ष लागले आहे.