हिंपळनेर परिसरातील खरीप पिकांची केली पाहणी; अडचणी जाणून घेत शेतकऱ्यांना दिलासा
चाकूर : तालुक्यातील हिंपळनेर परिसरात पावसाअभावी निर्माण झालेल्या प्रतिकूल परिस्थितीच्या पार्श्वभूमीवर सहकार मंत्री बाबासाहेब पाटील यांनी शेतकऱ्यांच्या बांधावर जाऊन खरीप पिकांची प्रत्यक्ष पाहणी केली. यावेळी त्यांनी शेतकऱ्यांशी संवाद साधत पिकांची सद्यस्थिती, झालेली नुकसानीची तीव्रता आणि शेतीसमोरील अडचणी जाणून घेतल्या.
पावसाने ओढ दिल्याने खरीप हंगामातील पिकांवर संकट ओढावले आहे. अनेक भागांत पिकांची वाढ खुंटली असून शेतकरी पावसाच्या प्रतीक्षेत आहेत. अशा परिस्थितीत सहकार मंत्र्यांनी शेतकऱ्यांच्या बांधावर जाऊन पाहणी केल्याने शेतकऱ्यांमध्ये शासन आपल्या अडचणी समजून घेत असल्याची भावना निर्माण झाली.
पाहणीदरम्यान मंत्री बाबासाहेब पाटील यांनी कृषी विभागाच्या अधिकाऱ्यांकडून चाकूर तालुक्यातील पीक परिस्थितीची सविस्तर माहिती घेतली. नैसर्गिक संकटामुळे शेतकऱ्यांनी घाबरून जाऊ नये. संकटाच्या काळात राज्य सरकार शेतकऱ्यांच्या पाठीशी ठामपणे उभे असून परिस्थितीचा आढावा घेऊन आवश्यक त्या उपाययोजना करण्यात येतील, अशी ग्वाही त्यांनी दिली.
यावेळी उपविभागीय अधिकारी मंजुषा लटपटे, तहसीलदार नरसिंग जाधव, गटविकास अधिकारी संतोष माने, तालुका कृषी अधिकारी शिवचंद्रपाल जाधव, सभापती प्रतिनिधी मच्छिंद्र नागरगोजे, उपसभापती भुजंग शिंदे, राहुल सुरवसे, पंचायत समिती गटनेते गजानन होनराव, नगराध्यक्ष भागवत फुले यांच्यासह पदाधिकारी, शेतकरी आणि विविध विभागांचे अधिकारी उपस्थित होते.
