अपिलीय यादी तयार करून मंजुराती देण्याची मागणी!
मानोरा (PM Awas Yojana) : प्रधानमंत्री आवास योजना ग्रामीण २०२५ - २६ च्या यादीत कोलार, सोमनाथनगर, गव्हा, आमगव्हाण, दापुरा बु या गावांसह तालुक्यातील अनेक गावांतील पात्र लाभार्थींची निवड यादी ऑनलाईन झाली नसल्याने त्या लाभार्थ्यांना अपिलीय यादी तयार करून त्यांना प्रधानमंत्री आवास योजनेत सामावून घेत न्याय देण्याची मागणी गटविकास अधिकारीसह जिल्हा परिषदेचे मुख्य कार्यकारी व जिल्हाधिकारी यांच्याकडे पंचायत समितीच्या माजी सदस्या सौ छाया राठोड यांनी निवेदन देऊन मागणी केली आहे.
दिलेल्या निवेदनात केंद्र शासनाच्या प्रधानमंत्री आवास ग्रामीण घरकुल योजनेपासून (PM Awas Yojana) वंचित पात्रं लाभार्थींची निवड यादी सन २०२५ - २६ च्या ग्रामसेवक व पंचायत समितीच्या कर्मचाऱ्या मार्फत सर्वेक्षण करून तयार करण्यात आलेल्या यादीला दि १५ ऑगस्ट ते ३० ऑगस्टच्या ग्रामसभेत मंजूरी दिलेल्या यादीतील अनेक लाभार्थींची नांवे ऑनलाइन झाली नसल्याने अनेक लाभार्थी वंचित राहण्याची शक्यता आहे. कोलार येथील २०१ नागरिकांची निवड यादी ऑनलाईन अपलोड केली असता त्यातील फक्त ५८ लाभार्थ्यांची नावे ऑनलाईन झाल्याने उर्वरित १४३ लाभार्थी वंचित राहत असल्याने ते लाभार्थी स्थानिक ग्रामसेवक सरपंच व पंचायत समितीच्या कार्यालयांची वारी करीत आहे.
असाच प्रकार गव्हा सोमनाथनगर, आमगव्हाण दापुरा बु सह अनेक गावातही झाल्याचे निदर्शनास आले असून, त्यामुळे पात्र लाभार्थ्यात चिंतेचे कारण बनले आहे. तेव्हा ऑनलाइन न झालेल्या लाभार्थ्यांची अपिलीय यादी तयार करून त्यामध्ये या अपात्र लोकांना घरकुल योजनेच्या लाभ देण्याची मागणी पंचायत समितीच्या माजी सदस्या सौ छाया राठोड सह जयराम चव्हाण, चिंतामण चव्हाण, गणेश चव्हाण, वसंता चव्हाण, गणेश चव्हाण, संजय चव्हाण, सुभाष चव्हाण, शुभम चव्हाण, प्रदीप रमेश चव्हाण,अरुण चव्हाण, वनराम चव्हाण, सौ. सुदलबाई चव्हाण लाभार्थ्यांनी निवेदन देऊन केली आहे.
