लिलाव प्रक्रीयेला व्यापार्‍यांकडून मिळाला नाही प्रतिसाद
हिंगोली (Hingoli Dussehra Festival) : येथील प्रसिध्द असलेल्या श्री सार्वजनिक दसरा महोत्सवाची जबाबदारी प्रशासनाने स्वीकारली. २८ सप्टेंबरला प्रदर्शनीतील झुले व दुकानांच्या लिलावाची प्रक्रीया घेण्यात आली. यामध्ये व्यापार्‍यांनी प्रतिसाद दिला नसल्याने झुले व दुकानांचा लिलाव बारगळला. आता लवकरच यावर प्रशासनाकडून निर्णय घेतला जाणार आहे.
सार्वजनिक दसरा महोत्सव (Hingoli Dussehra Festival) समितीच्या वतीने २८ सप्टेंबर रोजी उपविभागीय कार्यालयाच्या सभागृहात सार्वजनिक दसरा महोत्सव अंतर्गत घेण्यात येणार्‍या विविध लिलाव प्रक्रिया च्या अनुषंगाने तथा दसरा समितीचे अध्यक्ष तथा उपविभागीय अधिकारी समाधान घुटुकडे यांच्या दालनात लिलाव प्रक्रिया सुरू करण्यात आली. यावेळी तहसीलदार श्रीकांत भुजबळ, वकील संघाचे अध्यक्ष अ‍ॅड. श्रीधर घुगे यांची प्रमुख उपस्थिती होती. या प्रसंगी दसरा महोत्सव समितीच्या वतीने भरविण्यात येणार्‍या प्रदर्शनीतील २२० दुकाने व झुल्यांकरीता लिलावाची प्रक्रीया पार पाडली जात होती. गतवर्षी झुल्याच्या लिलावात १ कोटी ५ लाख रुपयाचे उत्पन्न झाले होते. तर प्रदर्शनीतील दुकानांच्या माध्यमातून ५५ लाख रुपये उत्पन्न झाले होते. त्यानुसार यावर्षी भरविण्यात येणार्‍या प्रदर्शनीत झुल्यांसाठी ८५ लाखांची तर २२० दुकानांकरीता ३० लाख रुपयाची शासकीय बोली ठेवली होती.
यावेळी बोटावर मोजण्या इतके व्यापारी या लिलाव प्रक्रीयेत सहभागी झाले होते. त्यांनी शासकीय बोली मान्य केली नसल्याने पहिली लिलावाची प्रक्रीया बारगळली. त्यामुळे प्रशासनाकडून यावर लवकरच विचार केला जाणार असल्याची माहिती देण्यात आली आहे.
