हिंगोली (Hingoli Cycle Rally) : जागतिक सायकल दिन आणि जागतिक पर्यावरण दिनाचे औचित्य साधून सद्भाव ह्यूमन डेव्हलपमेंट फाउंडेशन, जिल्हा सायकल असोसिएशन आणि आशा सायकल यांच्या संयुक्त विद्यमाने हिंगोली शहरात रविवारी भव्य सायकल रॅलीचे आयोजन करण्यात आले. 'सायकल चालवा, भविष्य घडवा' आणि 'आपली हिंगोली, ग्रीन हिंगोली, हेल्दी हिंगोली' अशा घोषणांनी संपूर्ण शहर दुमदुमून गेले.
रॅलीची (Hingoli Cycle Rally) सुरुवात छत्रपती शिवाजी महाराज यांच्या पुतळ्यास पुष्पहार अर्पण करून झाली. त्यानंतर पोस्ट ऑफिस रोड, जवाहर रोड, गांधी चौक, डॉ. बाबासाहेब आंबेडकर चौक, इंदिरा गांधी चौक, जिल्हाधिकारी कार्यालय मार्गे एन.टी.सी. परिसरात या रॅलीचा उत्साहात समारोप झाला. मुख्य मार्गांवरून जाताना सायकल स्वारांनी पर्यावरण वाचवा, आरोग्य जपा, झाडे लावा, जगवा अशा घोषणा देत जनजागृती केली.
या (Hingoli Cycle Rally) उपक्रमात शहरातील डॉक्टर, सामाजिक कार्यकर्ते, महिला, युवक-युवती आणि लहान मुलांनी मोठ्या संख्येने सहभाग नोंदवला. डॉ. यशवंत पवार, डॉ. राम मुंडे, डॉ. अभयकुमार भरतीया, डॉ. संजय नाकाडे, डॉ. अमित शाह, डॉ. झडपे, डॉ. प्रेमेंद्र बोथरा यांच्यासह संजय घन, गणेश पाटील, विजय ठाकरे, सारिका कयाल, ज्योती वाघमारे यांसारखे अनेक मान्यवर सायकलसह रॅलीत सहभागी झाले होते. सहभागींना टी शर्ट, टोपी, प्रमाणपत्र आणि नाश्ता देण्यात आला. लॉटरी पद्धतीने बक्षिसांचे वाटपही करण्यात आले.
वाहनांच्या वाढत्या वापरामुळे प्रदूषण वाढत असताना आरोग्यासाठी आणि पर्यावरणासाठी सायकल हा उत्तम पर्याय आहे, हा संदेश रॅलीतून देण्यात आला. दैनंदिन जीवनात सायकलचा वापर वाढवावा, देशी झाडे लावावीत, पावसाचे पाणी संकलित करावे, सिंगल यूज प्लास्टिक बंद करावे आणि कचरा न जाळता घंटागाडीत टाकावा, असे आवाहन यावेळी करण्यात आले. पर्यावरण प्रेमींच्या या उपक्रमाचे शहरभरातून कौतुक होत आहे.
