हिंगोली (Minister Narhari Zirwal) : औंढा नागनाथ तालुक्यातील मौजे गोजेगाव येथील कमलाबाई सोपान कांदे (वय ६०) यांच्या आत्महत्येनंतर पालकमंत्री नरहरी झिरवाळ (Minister Narhari Zirwal) यांनी त्यांच्या कुटुंबीयांची सांत्वनपर भेट घेऊन कुटुंबाची परिस्थिती जाणून घेतली. यावेळी त्यांनी कुटुंबीयांशी संवाद साधून त्यांचे सांत्वन केले. कमलाबाई कांदे यांच्या नावे स्वतंत्र शेतजमीन नसून शेती त्यांच्या पती सोपान विठोबा कांदे यांच्या नावे आहे. गोजेगाव येथील गट क्रमांक २२/२ (वर्ग-२) ही जमीन सामाईक खात्यावर असून त्यामध्ये सोपान विठोबा कांदे, दत्ता विठोबा कांदे व उद्धव विठोबा कांदे यांचा समावेश आहे.
कमलाबाई कांदे यांच्या पश्चात पती सोपान विठोबा कांदे, मुलगा विष्णू सोपान कांदे व सून असा परिवार आहे. पालकमंत्री नरहरी झिरवाळ (Minister Narhari Zirwal) यांनी कुटुंबीयांची आस्थेने विचारपूस करून त्यांना धीर दिला. यावेळी जिल्हाधिकारी राहुल गुप्ता, जिल्हा परिषदेचे मुख्य कार्यकारी अधिकारी विवेक गायकवाड, जिल्हा पोलीस अधीक्षक श्रेणिक लोढा, राष्ट्रवादी काँग्रेसचे नेते दिलीपराव चव्हाण माजी जिल्हाध्यक्ष बी.डी. बांगर यांच्यासह संबंधित अधिकारी व पदाधिकारी उपस्थित होते.
