घोट/गडचिरोली (Ghot Taluka Formation) : घोट येथे साईबाबा मंदिर मध्ये घोट तालुका संघर्ष समितीची बैठक आयोजित करण्यात आली होती. या बैठकीत माजी आमदार तथा भाजपा आदिवासी मोर्चाचे प्रदेशाध्यक्ष डॉ. देवराव होळी यांची प्रमुख उपस्थिती लाभली. या बैठकीत घोट तालुका निर्मितीचा महत्त्वपूर्ण मुद्दा चर्चेत आला असून समितीच्या वतीने माजी आमदार डॉ. होळी यांना या लढ्याचे नेतृत्व करण्याचा प्रस्ताव एकमुखाने मांडण्यात आला. यावर सकारात्मक प्रतिसाद देत डॉ. होळी यांनी नेतृत्व स्वीकारण्याची तयारी दर्शवली, मात्र हा लढा यशस्वी करण्यासाठी सर्व नागरिक, युवक, सामाजिक संघटना व सर्वपक्षीय कार्यकर्त्यांनी एकजुटीने पाठिंबा देणे आवश्यक असल्याचे त्यांनी स्पष्ट केले.
घोट तालुका निर्मितीचा (Ghot Taluka Formation) प्रश्न हा केवळ प्रशासकीय नसून स्थानिक विकास, प्रभावी प्रतिनिधित्व आणि नागरिकांच्या मूलभूत हक्कांशी निगडित आहे. सध्या नागरिकांना शासकीय कामांसाठी लांब अंतर पार करावे लागत असल्याने वेळ व आर्थिक खर्च वाढतो. नवीन तालुका निर्माण झाल्यास प्रशासन अधिक जवळ येऊन सेवा जलद व सुलभ पद्धतीने उपलब्ध होतील.यासोबतच शिक्षण, आरोग्य,रस्ते व इतर मूलभूत सुविधांच्या विकासाला गती मिळेल.विशेषत आदिवासी व दुर्गम भागातील नागरिकांना त्यांच्या हक्काचे प्रशासन मिळून त्यांचे सशक्तीकरण होईल.तसेच शासकीय कार्यालयांच्या स्थापनेमुळे स्थानिक स्तरावर रोजगाराच्या नवीन संधी निर्माण होतील.
या बैठकीस घोट तालुका संघर्ष समितीचे अध्यक्ष अशोक पोरेड्डीवार, सचिव आसिफ सय्यद, कोषाध्यक्ष अविनाश वडेट्टीवार,तमूस अध्यक्ष दिनकर लाकडे, विलास उईके,रूपा शहा, भाजपा बंगाली आघाडी जिल्हाध्यक्ष सुरेश शहा,गिरिश उपाध्ये,विलास गण्यारपवार,प्रशांत शहा,पवन दुधबावरे,बंडू जुवारे,आदी उपस्थित पदाधिकारी व नागरिकांनी घोट तालुका निर्मितीसाठी एकजुटीने लढा उभारण्याचा निर्धार व्यक्त केला. डॉ. देवराव होळी यांच्या नेतृत्वाखाली हा प्रश्न आता अधिक प्रभावीपणे शासन दरबारी मांडला जाणार असून घोट तालुका निर्मितीसाठीचा संघर्ष अधिक तीव्र होणार असल्याचे स्पष्ट झाले.
