नातेवाईकाच्या घरातच चोरी; चामोर्शी पोलिसांत गुन्हा दाखल
चामोर्शी : ऑनलाइन गेमिंगच्या नादात लाखो रुपये गमावल्यानंतर आर्थिक अडचणीत सापडलेल्या एका तरुणाने चक्क नातेवाईकाच्या विश्वासाचा गैरफायदा घेत घरातील सोन्याचे दागिने आणि रोख रक्कम लंपास केल्याचा प्रकार समोर आला आहे. एवढेच नव्हे, तर नातेवाईकाचा जेसीबी भाड्याने देण्याच्या बहाण्याने नेऊन तो परस्पर विकल्याचाही आरोप आहे. याप्रकरणी चामोर्शी पोलिसांनी गुन्हा दाखल केला असून पुढील तपास सुरू आहे.
पोलिसांकडून मिळालेल्या माहितीनुसार, आदित्य रविकिरण यमसनवार (२८, रा. पारवा, जि. यवतमाळ) हा यवतमाळ येथे अभियांत्रिकीचे शिक्षण घेत होता. याच काळात त्याला ऑनलाइन गेमिंगची सवय लागल्याचे सांगण्यात येते. या गेमिंगमध्ये त्याने सुमारे ३५ ते ४० लाख रुपये गमावल्याचा दावा फिर्यादीकडून करण्यात आला आहे.
त्याची सवय सुटावी आणि आर्थिक परिस्थिती सुधारावी, या उद्देशाने कुटुंबीयांनी मे २०२१ मध्ये त्याला चामोर्शी येथील एका नातेवाईकाकडे पाठविले होते. संबंधित नातेवाईक सरकारी कंत्राटदार असून त्यांनी आदित्यला चांदपूर फाटा येथील साईट कार्यालयात देखरेखीची जबाबदारी दिली होती. विश्वासाने काही आर्थिक व्यवहारही त्याच्याकडे सोपविण्यात आले होते.
तिजोरीतून साडेसात तोळे सोने गायब
दरम्यान, घरातील आणि कार्यालयीन आर्थिक व्यवहारांमध्ये अनियमितता जाणवू लागली. ११ जानेवारी २०२३ रोजी फिर्यादीच्या आईचे निधन झाल्यानंतर घरातील तिजोरीची पाहणी करण्यात आली. त्यावेळी दिवंगत आई, पत्नी आणि सासू यांचे तिजोरीत ठेवलेले सुमारे साडेसात तोळे सोन्याचे दागिने गायब असल्याचे लक्षात आले.
चौकशीत हे दागिने चामोर्शी येथील एका सराफा व्यापाऱ्याकडे २ लाख ५५ हजार रुपयांत विकल्याची माहिती समोर आल्याचे फिर्यादीने म्हटले आहे.
भाड्याच्या बहाण्याने जेसीबीही लांबवला
डिसेंबर २०२३ मध्ये आरोपीने आरमोरी येथील एका ओळखीच्या व्यक्तीला जेसीबी भाड्याने देण्याच्या बहाण्याने नेला आणि त्यानंतर तो परस्पर कबाडात विकल्याचाही आरोप तक्रारीत करण्यात आला आहे.
या संपूर्ण प्रकरणाची तक्रार प्राप्त झाल्यानंतर चामोर्शी पोलीस ठाण्यात गुन्हा दाखल करण्यात आला आहे. पोलीस निरीक्षक महादेव ढाकणे यांच्या मार्गदर्शनाखाली प्रकरणाचा पुढील तपास सुरू असून आर्थिक व्यवहार तसेच अन्य व्यक्तींचा सहभाग आहे का, याचीही पडताळणी केली जात आहे.
