जिल्हाधिकारी राहुल गुप्ता यांनी काढले आदेश
हिंगोली (Corrupt Revenue Officer) : सेनगाव तालुक्यातील खिल्लार सज्जाचे ग्राम महसुल अधिकारी (तलाठी) रामेश्वर अर्जुन रोडगे यांनी ५ जूनला एका शेतकर्‍याकडून सातबारावर नाव लावण्याकरीता १४ हजाराची लाच स्विकारली होती. यावेळी लाचलुचपत प्रतिबंधक विभागाच्या पथकाने हिंगोली - सेनगाव रस्त्यावरील पुसेगाव फाटा परिसरात लाच घेताना रंगेहात पकडले होते. या (Corrupt Revenue Officer) प्रकरणात नर्सी नामदेव पोलिसात गुन्हा दाखल झाला होता. त्यावरून त्यांना न्यायालयात हजर करण्यात आले असता पोलिस कोठडी सुनावली होती. त्यानंतर त्यांना न्यायालयिन कोठडी सुनावल्याने परभणी कारागृहात रवानगी करण्यात आली होती. या दरम्यान जामीनसाठी अर्ज दाखल केला असता न्यायालयाने त्यांची जामीनवर मुक्तता केली होती.
या (Corrupt Revenue Officer) प्रकरणाचा अहवाल लाचलुचपत प्रतिबंधक विभागामार्फत जिल्हा प्रशासनाकडे सादर करण्यात आला होता. त्यावरून जिल्हाधिकारी राहुल गुप्ता यांनी १२ जून रोजी काढलेल्या आदेशात खिल्लार सज्जाचे तलाठी रामेश्वर अर्जुन रोडगे यांच्या निलंबनाचे आदेश काढले. या प्रकरणी त्यांची विभागीय चौकशी सुरू करण्यात आली असुन हा आदेश अंमलात असेपर्यंत तहसील कार्यालय हिंगोली येथे मुख्यालयी उपस्थित राहण्याचे आदेशात नमुद करण्यात आले आहे.
