हिंगोली (District Bank Election) : परभणी जिल्हा मध्यवर्ती सहकारी बँकेच्या आगामी पंचवार्षिक निवडणुकीच्या पार्श्वभूमीवर राजकीय हालचालींना वेग आला असून हिंगोली विविध कार्यकारी सेवा सहकारी संस्थेत महत्त्वाचा निर्णय घेण्यात आला आहे. संस्थेच्या विशेष सभेत आमदार संतोष बांगर यांचे समर्थक चंद्रकांत गायबाजी बांगर यांच्या नावाचा ठराव सर्वानुमते मंजूर करण्यात आला.
या निर्णयानंतर आयोजित कार्यक्रमाला कळमनुरी मतदारसंघाचे आमदार संतोषराव बांगर आणि शिवसेना संपर्कप्रमुख आनंदराव जाधव यांनी प्रमुख उपस्थिती लावली. यावेळी हिंगोली सोसायटीचे चेअरमन पंढरीनाथ बांगर, व्हॉइस चेअरमन दत्तराव बांगर तसेच नवनियुक्त प्रतिनिधी चंद्रकांत बांगर यांचा शाल, श्रीफळ आणि पुष्पहार देऊन सत्कार करण्यात आला.
कार्यक्रमात युवा सेना जिल्हा प्रमुख राम कदम, शहर प्रमुख अशोकराव नाईक, नगरसेवक सुभाष बांगर, नगरसेवक गणेश बांगर, माजी जि.प. सभापती फकिरा मुंढे, चंदू लव्हाळे, भरत चौधरी, कपील खंडेलवाल, केशव दुबे, सुरेश शेळके यांच्यासह अनेक मान्यवर उपस्थित होते.
दरम्यान, सोसायटीच्या पदाधिकाऱ्यांमध्ये वैजनाथ बांगर, सचिन बांगर, गंगाधर बांगर, संजय झाडे, शिवाजी बांगर, उमेश नागरे, प्रकाशराव बांगर तसेच संचालक, सभासद आणि शिवसेना कार्यकर्ते मोठ्या संख्येने सहभागी झाले होते.
जिल्हा बँकेच्या निवडणुकीच्या पार्श्वभूमीवर आमदार बांगर गटाने सहकार क्षेत्रात आपली पकड मजबूत करण्याचा प्रयत्न केल्याचे या घडामोडीतून स्पष्ट होत आहे. ग्रामीण अर्थव्यवस्थेचा कणा असलेल्या जिल्हा मध्यवर्ती सहकारी बँकेवरील वर्चस्वासाठी सर्वच राजकीय गटांनी जोरदार तयारी सुरू केली आहे.
