मुंबई पोलिसांकडून एफआयआर; सतीश सालियन यांच्या जबाबावर सीबीआयच्या तपासानंतर कारवाई, विविध कलमांनुसार गुन्हा नोंद
दिवंगत सेलिब्रिटी मॅनेजर दिशा सालियन यांच्या मृत्यू प्रकरणाने पुन्हा एकदा चर्चेला उधाण आले आहे. तब्बल सहा वर्षांनंतर मुंबई पोलिसांनी या प्रकरणात गुन्हा दाखल केला आहे. दिशावर अत्याचार करून तिची हत्या करण्यात आल्याचा आरोप ठेवत हा गुन्हा नोंदवण्यात आला असून, सतीश सालियन यांच्या जबाबाच्या आधारे सीबीआयच्या तपासानंतर एफआयआर दाखल करण्यात आल्याची माहिती आहे.
या प्रकरणात भारतीय दंड विधानातील कलम 302 (हत्या), 376 (सामूहिक अत्याचार), 120(ब) (कट रचणे), 201 (पुरावे नष्ट करणे), तसेच कलम 217 आणि 218 अंतर्गत गुन्हा दाखल करण्यात आला आहे.
सहा वर्षांनंतर प्रकरणाला नवे वळण
दिशा सालियन मृत्यू प्रकरणात मुंबई उच्च न्यायालयाने नुकताच महत्त्वपूर्ण निकाल दिला होता. या प्रकरणाच्या तपासासाठी सीबीआय अधिकाऱ्याची नियुक्ती करण्याचे निर्देश न्यायालयाने दिले होते. तसेच BNS अंतर्गत गुन्हा दाखल करण्याचे आदेशही न्यायालयाने दिल्याचे नमूद करण्यात आले आहे.
दिशा सालियन यांचा मृत्यू 8 जून 2020 रोजी मुंबईतील मालाड परिसरातील एका इमारतीच्या 14व्या मजल्यावरून पडून झाला होता. त्यानंतर अवघ्या सहा दिवसांनी, म्हणजे 14 जून 2020 रोजी अभिनेता सुशांत सिंह राजपूत यांचाही मृत्यू झाला होता. या दोन्ही घटनांमुळे त्यावेळी मनोरंजन क्षेत्रासह राजकीय वर्तुळातही मोठी चर्चा झाली होती.
दिशा यांच्या वडिलांनी, सतीश सालियन यांनी मुलीच्या मृत्यूची पुन्हा चौकशी व्हावी आणि तपास सीबीआयकडे सोपवावा, अशी मागणी करत मुंबई उच्च न्यायालयात याचिका दाखल केली होती. त्यानंतर आता या प्रकरणात सहा वर्षांनी गुन्हा नोंदवण्यात आला आहे.
दिशा सालियन प्रकरण नेमकं काय?
दिशा सालियन या मनोरंजन क्षेत्रातील सेलिब्रिटी मॅनेजर म्हणून कार्यरत होत्या. त्यांनी वरुण शर्मा, सुशांत सिंह राजपूत आणि भारती सिंह यांच्यासह अनेक प्रसिद्ध कलाकारांसोबत काम केले होते.
त्यांच्या मृत्यूची घटना 8 जून 2020 रोजी घडली. उपलब्ध माहितीनुसार, घटनेनंतर तीन दिवसांनी दिशांचे शवविच्छेदन करण्यात आले होते. पोस्टमॉर्टम अहवालात त्यांच्या हाताला, पायाला आणि छातीवर दुखापतींच्या नोंदी असल्याचे नमूद करण्यात आले होते. डोक्याला झालेल्या गंभीर दुखापतीमुळे मृत्यू झाल्याचे अहवालात नमूद करण्यात आले होते. तसेच नाक आणि तोंडातून रक्तस्राव झाल्याचाही उल्लेख करण्यात आला होता.
मात्र, त्याच पोस्टमॉर्टम अहवालात दिशांवर लैंगिक अत्याचार किंवा बलात्कार झाल्याचे आढळले नसल्याचे स्पष्ट नमूद करण्यात आले होते.
2022 मध्ये विधानसभेतही मुद्दा गाजला
दिशा सालियन यांच्या मृत्यूचा मुद्दा 2022 मध्ये महाराष्ट्र विधानसभेतही उपस्थित झाला होता. शिवसेनेच्या शिंदे गटाचे आमदार भरत गोगावले आणि भाजप आमदार नितेश राणे यांनी या प्रकरणाच्या चौकशीची मागणी केली होती. यावेळी सभागृहात आमदारांमध्ये मोठा गोंधळही झाला होता.
नितेश राणे यांनी या प्रकरणाच्या संदर्भात आदित्य ठाकरे यांच्या नार्को टेस्टची मागणी केली होती. त्यामुळे दिशा सालियन मृत्यू प्रकरणाला त्यावेळी राजकीय रंगही मिळाला होता.
आता मुंबई पोलिसांकडून गुन्हा दाखल झाल्याने या प्रकरणाच्या पुढील तपासाकडे सर्वांचे लक्ष लागले आहे.
