सोनखेड येथील ग्रामसभेत गोंधळ; सरपंचाच्या अंगावर धावून जात ग्रामसभा बरखास्त करण्याचा प्रयत्न
परभणी : पूर्णा तालुक्यातील सोनखेड येथे ग्रामसभा सुरू असताना गोंधळ घालत महिला सरपंचाला शिवीगाळ करून जिवे मारण्याची धमकी दिल्याची घटना समोर आली आहे. ग्रामसभा बरखास्त करण्याचा प्रयत्न करत सरपंचाच्या अंगावर धावून गेल्याचा आरोप असून, याप्रकरणी दोन भावांविरुद्ध चुडावा पोलीस ठाण्यात गुन्हा दाखल करण्यात आला आहे.
ही घटना गुरुवार २७ ऑगस्ट रोजी सकाळी १० वाजेच्या सुमारास सोनखेड येथे घडली. याप्रकरणी मुक्ताबाई सोपानराव सूर्यवंशी (वय ७७ वर्षे), रा. सोनखेड यांनी चुडावा पोलिसांत फिर्याद दिली आहे. त्या सोनखेडच्या सरपंच आहेत.
फिर्यादीनुसार, २७ ऑगस्ट रोजी सकाळी सुमारे १० वाजता सोनखेड ग्रामपंचायत कार्यालयासमोरील सार्वजनिक ठिकाणी ग्रामसभा सुरू होती. यावेळी आरोपींनी संगनमत करून ग्रामसभेत गोंधळ घातला. ग्रामसभा बरखास्त करण्याचा प्रयत्न करत महिला सरपंचांच्या अंगावर धावून जात त्यांना अश्लील शिवीगाळ करण्यात आल्याचे फिर्यादीत नमूद आहे.
तसेच सरपंचांना त्यांचे सार्वजनिक कर्तव्य बजावण्यापासून परावृत्त करण्याचा प्रयत्न करण्यात आला. याशिवाय सरपंच आणि त्यांच्या कुटुंबीयांना जिवे मारण्याची धमकी दिल्याचाही आरोप आहे.
या प्रकरणी गणपत गोविंद सूर्यवंशी आणि धनाजी गोविंद सूर्यवंशी, दोघेही रा. सोनखेड, यांच्याविरुद्ध चुडावा पोलीस ठाण्यात गुन्हा दाखल करण्यात आला आहे.
सपोनि किनगे यांच्या मार्गदर्शनाखाली पोहेकॉ कच्छवे पुढील तपास करीत आहेत.
