ठाणे (Court Hearing) : मनसेप्रमुख राज ठाकरे यांनी आज जिल्हा व सत्र न्यायालय ठाणे येथे हजेरी लावली. 2008 मधील रेल्वे भरती आंदोलन प्रकरणाच्या सुनावणीसाठी ते कोर्टात उपस्थित होते. या प्रकरणात राज ठाकरेंसह एकूण सात जण आरोपी असून, आज सर्वांच्या जबानी नोंदवण्यात आल्या. न्यायालयात राज ठाकरे यांनी स्पष्टपणे सांगितले की, “माझा या गुन्ह्याशी काहीही संबंध नाही.”
या प्रकरणाची पार्श्वभूमी 2008 सालातील आहे. त्या वेळी रेल्वे भरतीदरम्यान कल्याण स्थानकावर मनसे कार्यकर्त्यांनी उत्तर भारतीय उमेदवारांना लक्ष्य करत मारहाण केली होती आणि रेल्वे मालमत्तेचेही नुकसान झाले होते. “मराठी तरुणांच्या नोकऱ्या परप्रांतीयांनी हिरावल्या” या आरोपावरून हे आंदोलन करण्यात आले होते. या आंदोलनात हिंसाचाराला प्रोत्साहन दिल्याचे आरोपही करण्यात आले होते, ज्यामुळे राज ठाकरे आणि इतर कार्यकर्त्यांवर गुन्हे दाखल झाले.
आजच्या सुनावणीत न्यायाधीशांनी इतर सहा आरोपींवरील आरोप वाचून दाखवले. त्यामध्ये उत्तर भारतीय परीक्षार्थींना लाठ्या-काठ्यांनी मारहाण केल्याचा आणि त्यात अनेक जण जखमी झाल्याचा उल्लेख होता. तसेच, साक्षीदारांचे जबाबही न्यायालयात वाचून दाखवण्यात आले.
सुनावणीनंतर कोर्टाबाहेर राज ठाकरेंसह इतर आरोपींनी एकत्रित फोटो काढले. दरम्यान, राज ठाकरे यांनी पुन्हा एकदा आपली भूमिका स्पष्ट करत आंदोलनावेळी आपण नाशिकमध्ये असल्याचे सांगितले.
राज ठाकरेंचे वकील विजय नांगरे यांनी माध्यमांना माहिती देताना सांगितले की, या प्रकरणाची पुढील सुनावणी 18 मे 2026 रोजी होणार आहे. त्या दिवशी राज ठाकरेंना कोर्टात उपस्थित राहण्याची आवश्यकता नाही.
यापूर्वी डिसेंबर महिन्यातही या प्रकरणाची सुनावणी झाली होती. त्यावेळीही राज ठाकरे यांनी कोर्टासमोर आपण दोषी नसल्याचे सांगितले होते आणि न्यायालयीन प्रक्रियेला पूर्ण सहकार्य करण्याची तयारी दर्शवली होती. आता या प्रकरणाची पुढील दिशा 18 मे रोजी होणाऱ्या सुनावणीत स्पष्ट होणार आहे.
