शेतकऱ्यांची विज कंपनी कार्यालयावर धडक
मानोरा (Chakur Electricity Supply) : तालुक्यातील चाकूर गावातील वीजपुरवठा अनेक दिवसांपासून खंडित असल्याने संपूर्ण गाव अंधारात बुडाले आहे. तसेच सुमारे 75 कृषी मोटारपंपांची वीज लाईन बंद असल्याने शेतकऱ्यांसमोर मोठे संकट उभे राहिले आहे. पिकांना पाणी देणे अशक्य झाल्याने शेतकरी चिंतेत आहेत. त्यामुळे शेतकऱ्यांनी आक्रमक होत विज वितरण कंपनी कार्यालयावर धडक देत कृषी पंपाचा विज पुरवठा तातडीने तात्काळ सुरू करण्याची मागणी केली.
स्थानिकांच्या म्हणण्यानुसार, महावितरणचे संबंधित अधिकारी गिरी हजर नसल्यामुळे समस्या अधिक गंभीर बनली आहे. त्यांचा मोबाईल फोनही बंद असल्याने शेतकऱ्यांना संपर्क साधता येत नाही. वारंवार तक्रारी करूनही वीजपुरवठा पूर्ववत करण्यात आलेला नाही, असा आरोप ग्रामस्थांनी केला आहे. या (Chakur Electricity Supply) समस्येबाबत संतप्त शेतकरी सब-स्टेशनवर दाखल झाले होते. त्यांनी तात्काळ वीजपुरवठा सुरळीत करण्याची मागणी केली. पावसाचा खंड पडलेला असताना वीज नसल्यामुळे उभ्या पिकांचे मोठे नुकसान होण्याची भीती व्यक्त करण्यात येत आहे.
शेतकरी व ग्रामस्थांनी वीज वितरण कंपनीच्या वरिष्ठ अधिकाऱ्यांनी तातडीने लक्ष घालून गावाचा व कृषी पंपांचा वीजपुरवठा सुरू करावा, अशी मागणी केली आहे. यावेळी राजू चव्हाण, दिनेश मोरे, कैलास पाटील, पंजाब चव्हाण, बाळू जाधव, रवि राठोड, दिनेश राठोड, पप्पू राठोड. अनील राठोड, अजय राठोड, राम बोचट, ऋतिक राठोड आदी उपस्थित होते.
