वाघोलीत घरफोडी; रात्री घराचे कुलूप तोडून दागिने व रोकड लंपास

चाकूर (Wagholi Burglary case) : तालुक्यातील वाघोली येथे अज्ञात चोरट्याने घराच्या पत्र्याच्या शेडचे कुलूप तोडून आत प्रवेश करत लोखंडी कपाट फोडून सोन्या-चांदीचे दागिने व रोख रक्कम असा एकूण १ लाख ४२ हजार ४०० रुपयांचा मुद्देमाल लंपास केल्याची घटना उघडकीस आली. पोलिसांनी दिलेल्या माहितीनुसार, वाघोली येथील गंगाधर गहिणाजी केंद्रे (वय ७२) यांच्या राहत्या घरात ३० सप्टेंबर रोजी रात्री ११ वाजेनंतर ते १ ऑक्टोबर रोजी पहाटे ५ वाजण्यापूर्वीच्या कालावधीत ही चोरी झाली. अज्ञात चोरट्याने पत्र्याच्या शेडचे कुलूप तोडून आत प्रवेश केला. त्यानंतर लोखंडी कपाट फोडून त्यातील सोन्याचे विविध दागिने, चांदीचे कडे आणि २५ हजार रुपये रोख रक्कम चोरून नेली.

चोरीस गेलेल्या मुद्देमालामध्ये सोन्याचे सेवन पीस, मण्यांच्या पोती, झुमके, कानातील दागिने, फुले, मणी, बाळ्या, काडी व पान तसेच पाच तोळे वजनाचे चांदीचे कडे यांचा समावेश आहे. दागिन्यांची अंदाजे किंमत १ लाख १७ हजार ४०० रुपये असून, रोख २५ हजार रुपये असा एकूण १ लाख ४२ हजार ४०० रुपयांचा मुद्देमाल चोरीस गेला आहे.

या (Wagholi Burglary case) प्रकरणी गंगाधर केंद्रे यांच्या फिर्यादीवरून चाकूर पोलिस ठाण्यात गुन्हा क्रमांक ५३६/२०२६, भारतीय न्याय संहितेच्या कलम ३३१(४), ३०५(अ) अन्वये गुन्हा दाखल करण्यात आला आहे. गुन्ह्याचा पुढील तपास ग्रेड पोलीस उपनिरीक्षक सूर्यवंशी करीत आहेत.

घटनास्थळी उपविभागीय पोलीस अधिकारी मायने, पोलीस निरीक्षक भंडे आणि ग्रेड पोलीस उपनिरीक्षक सूर्यवंशी यांनी भेट देऊन पाहणी केली. घटनास्थळाचा पंचनामा करण्यात आला असून, अज्ञात चोरट्याचा शोध घेण्यासाठी पोलिसांकडून तपास सुरू आहे.