दमास्कसमधील 'फोर सीझन्स' हॉटेल परिसर हादरला; राष्ट्राध्यक्ष इमॅन्युएल मॅक्रॉन सुरक्षित, अहमद अल-शारा यांच्यासोबत नियोजित बैठक पार
दमास्कस : फ्रान्सचे राष्ट्राध्यक्ष इमॅन्युएल मॅक्रॉन यांच्या सीरिया दौऱ्यादरम्यान राजधानी दमास्कस येथे मोठी सुरक्षा घटना घडली. मॅक्रॉन ज्या 'फोर सीझन्स' हॉटेलमध्ये वास्तव्यास होते, त्या हॉटेलच्या परिसरात मंगळवारी दोन स्फोट झाल्याने खळबळ उडाली. या घटनेनंतर परिसरात तातडीने सुरक्षा व्यवस्था वाढवण्यात आली. मात्र, मॅक्रॉन सुरक्षित असून त्यांनी नियोजित कार्यक्रमानुसार सीरियाचे राष्ट्राध्यक्ष अहमद अल-शारा यांची भेट घेतली.
स्फोटांनंतर घटनास्थळावर धुराचे लोट दिसून आले, तर सुरक्षेच्या कारणास्तव परिसरातील रस्ते तात्पुरते बंद करण्यात आले. एका सुरक्षा अधिकाऱ्याने दिलेल्या माहितीनुसार, राजधानीच्या मध्यवर्ती भागात झालेल्या या दोन स्फोटांमध्ये स्फोटकांचा वापर करण्यात आला होता.
दरम्यान, फ्रान्सच्या राष्ट्राध्यक्ष कार्यालयाने (Élysée Palace) स्पष्ट केले की, राष्ट्राध्यक्षांच्या ताफ्याला हे स्फोट ऐकू आले नाहीत. मॅक्रॉन यांच्या अधिकृत पत्रकार गटासोबत असलेल्या Reuters च्या प्रतिनिधीलाही कोणताही गोंधळ किंवा स्फोटाचा प्रत्यक्ष अनुभव आला नसल्याचे वृत्तात नमूद करण्यात आले आहे.
🚨#Damascus: Additional footage of the terrorist bombings that took place near the Four Seasons Hotel in Damascus, where French President #Macron is staying.
— Syria Justice Archive (@SyJusticeArc) July 7, 2026
❗️ Not one terrorist bombing, several... https://t.co/ZfxdTWMeN0 pic.twitter.com/qFuGKIWOqj
यानंतर सीरियाच्या सरकारी दूरचित्रवाणीने मॅक्रॉन आणि राष्ट्राध्यक्ष अहमद अल-शारा यांची राष्ट्रपती भवनात नियोजित बैठक पार पडल्याची माहिती दिली. या दौऱ्यात दोन्ही नेत्यांमध्ये विविध द्विपक्षीय आणि प्रादेशिक विषयांवर चर्चा झाल्याचे सांगण्यात आले.
२०२४ मध्ये बशर अल-असद यांची सत्ता उलथवून लावल्यानंतर सीरियाला भेट देणारे युरोपियन युनियनमधील पहिले राष्ट्रप्रमुख म्हणून मॅक्रॉन यांचा हा दौरा महत्त्वाचा मानला जात आहे. अहमद अल-शारा यांच्या नेतृत्वाखाली सीरियात सुरू झालेल्या नव्या राजकीय घडामोडी आणि पाश्चात्त्य तसेच मध्यपूर्वेतील देशांशी वाढत असलेले संबंध यामुळे या भेटीकडे आंतरराष्ट्रीय स्तरावर विशेष लक्ष लागले होते.
अहमद अल-शारा हे पूर्वी अल-कायदाशी संबंधित गटाशी जोडले गेले होते. सत्तांतरानंतर त्यांनी सर्वसमावेशक प्रशासन उभारण्याचे आश्वासन दिले आहे. मात्र, सरकारसमर्थक गट आणि धार्मिक तसेच वांशिक अल्पसंख्याकांमधील हिंसाचाराच्या घटनांमुळे त्यांच्या नेतृत्वासमोर अजूनही मोठी सुरक्षा आणि राजकीय आव्हाने कायम आहेत.
