नवी दिल्ली : कृत्रिम बुद्धिमत्तेवर आधारित लोकप्रिय चॅटबॉट ChatGPT च्या सेवांमध्ये ७ जुलै रोजी काही काळ अडथळे निर्माण झाल्याने जगभरातील अनेक वापरकर्त्यांना विविध फीचर्स वापरताना अडचणींचा सामना करावा लागला. Codex, Custom GPTs, Workspace Analytics, Conversation Search तसेच इतर एंटरप्राइझ सेवांमध्ये समस्या निर्माण झाल्याच्या तक्रारी समोर आल्या. यासंदर्भात OpenAI नेही सेवा विस्कळीत झाल्याची अधिकृत पुष्टी केली.
Downdetector या आउटेज ट्रॅकिंग प्लॅटफॉर्मनुसार, सकाळी सुमारे 10:30 वाजल्यापासून ChatGPT आणि OpenAI च्या विविध सेवांबाबत तक्रारींमध्ये अचानक वाढ झाली. वापरकर्त्यांनी ChatGPT, DALL·E, विविध GPT मॉडेल्स आणि OpenAI API वापरताना अडचणी येत असल्याची नोंद केली.
ही बातमी प्रसिद्ध होईपर्यंत काही वापरकर्त्यांना ChatGPT द्वारे प्रतिमा (Image Generation) तयार करण्यातही अडचणी येत असल्याचे दिसून आले.
दरम्यान, OpenAI ने अधिकृत स्टेटस अपडेटमध्ये सांगितले की, FedRAMP Workspaces मधील अनेक सेवांवर या समस्येचा परिणाम झाला आहे. कंपनीच्या माहितीनुसार, FedRAMP Codex, Workspace Analytics, Conversation Search, Custom GPT Search, ChatGPT User Invites आणि Compliance Log Platform Download Endpoint या सेवांमध्ये तांत्रिक अडचणी निर्माण झाल्या होत्या.
यानंतर OpenAI ने आणखी एका निवेदनात मुख्य सेवा (Core Functionality) पुन्हा सुरू करण्यात आल्याचे सांगितले. मात्र, FedRAMP Workspaces मधील काही सेवा अद्याप पूर्णपणे सुरळीत झालेल्या नसून त्या दुरुस्त करण्याचे काम सुरू असल्याचे कंपनीने स्पष्ट केले. अधिक माहिती उपलब्ध होताच पुढील अपडेट दिले जाईल, असेही OpenAI ने म्हटले आहे.
२०२२ मध्ये लॉन्च झालेल्या ChatGPT ने अलीकडेच आणखी एक महत्त्वाचा टप्पा गाठला आहे. Reuters ने Sensor Tower च्या आकडेवारीचा हवाला देत दिलेल्या वृत्तानुसार, ChatGPT हे जगभरात एक अब्ज (1 Billion) मासिक सक्रिय वापरकर्त्यांचा टप्पा सर्वात वेगाने गाठणारे अॅप ठरले आहे. हा टप्पा TikTok, Instagram, YouTube आणि Google Maps यांसारख्या लोकप्रिय अॅप्सपेक्षाही कमी कालावधीत गाठल्याचे नमूद करण्यात आले आहे.
दरम्यान, Sensor Tower च्या निरीक्षणानुसार, २०२६ च्या सुरुवातीला Anthropic च्या Claude अॅपचा वापर सुरू केलेल्या अमेरिकन वापरकर्त्यांमध्ये ChatGPT वरील वापर सुमारे ५ टक्क्यांनी घटल्याचेही दिसून आले आहे.
