11 हजार आंतरराष्ट्रीय धावा करणारी पहिली महिला क्रिकेटपटू
नवी दिल्ली/ जपान (Smriti Mandhana Record) : भारतीय महिला क्रिकेट संघाची स्टार सलामीवीर स्मृती मंधानाने 22 सप्टेंबर 2026 हा दिवस महिला क्रिकेटच्या इतिहासात सुवर्णाक्षरांनी नोंदवला. आशियाई क्रीडा स्पर्धेतील श्रीलंकेविरुद्धच्या सुवर्णपदकाच्या सामन्यात खेळताना (Smriti Mandhana) मंधानाने 11 हजार आंतरराष्ट्रीय धावांचा ऐतिहासिक टप्पा गाठला. हा पराक्रम करणारी ती महिला क्रिकेटमधील पहिली फलंदाज ठरली आहे. 11 हजार धावांचा टप्पा गाठण्यासाठी मंधानाला केवळ 13 धावांची गरज होती. तिने श्रीलंकेविरुद्धच्या डावात सुरुवातीच्या 10 चेंडूंतच ही आवश्यक धावसंख्या पूर्ण करत इतिहास रचला.
मंधानाची फटकेबाजी; 79 धावांची खेळी
ऐतिहासिक विक्रम केल्यानंतरही मंधानाची (Smriti Mandhana) आक्रमक फलंदाजी सुरूच राहिली. तिने 45 चेंडूंत 79 धावा करताना तब्बल 7 षटकार आणि 5 चौकार लगावले. मंधाना आणि शेफाली वर्मा यांनी पहिल्या विकेटसाठी 99 धावांची भागीदारी करत भारताला दमदार सुरुवात करून दिली. शेफालीने 29 चेंडूंत 48 धावांची आक्रमक खेळी केली. त्यानंतर ऋचा घोषने अखेरच्या षटकांमध्ये धडाकेबाज फलंदाजी करत 22 चेंडूंत नाबाद 49 धावा केल्या. तिच्या खेळीत 6 चौकार आणि 3 षटकारांचा समावेश होता.
भारताचा आशियाई क्रीडा स्पर्धेतील विक्रमी स्कोअर
मंधाना, शेफाली आणि ऋचा यांच्या तुफानी फलंदाजीच्या जोरावर भारताने श्रीलंकेविरुद्ध 20 षटकांत 3 बाद 216 धावा उभारल्या. हा आशियाई क्रीडा स्पर्धेतील महिला क्रिकेटमधील विक्रमी संघसंघ आहे.
काही दिवसांतच अनेक विक्रम
मंधानासाठी (Smriti Mandhana) हा विक्रम अचानक आलेला नाही. नुकत्याच झालेल्या आशिया कपमध्ये हाँगकाँगविरुद्ध 124 धावांची खेळी करत तिने महिला आंतरराष्ट्रीय क्रिकेटमध्ये सर्वाधिक धावा करणारी फलंदाज म्हणून मिताली राजचा 10,868 धावांचा विक्रम मागे टाकला होता. यानंतर आशियाई क्रीडा स्पर्धेच्या उपांत्य सामन्यात बांगलादेशविरुद्ध 37 धावा करत मंधाना महिला टी-20 आंतरराष्ट्रीय क्रिकेटमध्ये सर्वाधिक धावा करणारी फलंदाज ठरली. आता 11 हजार आंतरराष्ट्रीय धावांचा टप्पा गाठत (Smriti Mandhana) मंधानाने महिला क्रिकेटच्या इतिहासात आणखी एक मोठा विक्रम आपल्या नावावर केला आहे.
