वसमत तालुक्यातील बळेगाव येथील घटना
हिंगोली (Maratha Reservation Suicide) : वसमत तालुक्यातील बळेगाव येथील ४८ वर्षीय व्यक्तीने मराठा आरक्षण व हैद्राबाद गॅझेटसाठी गळफास घेऊन आत्महत्या केल्याची घटना घडल्याने हट्टा पोलिस ठाण्यात नोंद घेण्याची प्रक्रिया सुरू होती.
पोलिस सुत्राकडुन मिळालेली माहिती अशी की, वसमत तालुक्यातील बळेगाव येथील नवनाथ रंगनाथ गोटे (४८) हे मराठा आरक्षणाच्या आंदोलनात नेहमीच सक्रीय होते. मराठा योद्धा मनोज जरांगे यांच्या हिंगोली जिल्ह्यातील सभांसाठी देखील त्यांचा नेहमी पुढाकार असायचा. (Maratha Reservation Suicide) मराठा समाजाचा आरक्षण मिळाले पाहिजे तसेच हैद्राबाद गॅझेट लागु झाला पाहिजे असे ते नेहमी बोलुन दाखवत होते. ३ मे रोजी सायंकाळच्या सुमारास शेतामध्ये गेले होते. परंतु बराच वेळ होऊनही ते घरी परतले नसल्याने कुटूंबीयांनी त्यांचा शोध सुरू केला. याच दरम्यान झाडाला लटकलेल्या अवस्थेत नवनाथचा मृतदेह दिसून आला.
या (Maratha Reservation Suicide) बाबतची माहिती हट्टा पोलिस ठाण्याला दिल्यावर सहाय्यक पोलिस निरीक्षक संग्राम जाधव, संदिप सुरूशे, संदिप चव्हाण यांच्या पथकाने घटनास्थळी भेट दिल्या नंतर पाहणी केली. या वेळी नवनाथच्या खिशामध्ये चिठ्ठी आढळली. ‘हैद्राबाद गॅझेटसाठी मी मरत आहे मला माफ करा’ असे चिठ्ठीमध्ये नमुद केले होते. या नंतर नवनाथचा मृतदेह वसमत ग्रामीण रुग्णालयात शवविच्छेदनासाठी नेण्यात आला. ४ मे रोजी शव विच्छेदन झाल्या नंतर मृतदेह नातेवाईकांच्या स्वाधीन करण्यात आला. मयत नवनाथ यांच्या पश्च्यात आई, पत्नी, दोन मुले, एक मुलगी असा परिवार आहे. नवनाथच्या आत्महत्यामुळे गावावर शोककळा पसरली आहे.
