९ ऑगस्टला ३०-४० किमी वेगाने वारे आणि विजांचा कडकडाट; १० ऑगस्टला विदर्भातील बहुतांश जिल्ह्यांत पावसाचा अंदाज
महाराष्ट्रातील पावसाचा जोर पुन्हा वाढण्याची शक्यता आहे. मुंबई हवामान विभागाने पुढील चार दिवसांसाठी राज्यातील विविध भागांत पावसाचा अंदाज व्यक्त केला असून, उत्तर महाराष्ट्र आणि मराठवाड्यात विजांच्या कडकडाटासह वादळी पावसाची शक्यता आहे. मुंबई, ठाणे, पुणे आणि नाशिकमध्ये प्रामुख्याने ढगाळ वातावरण राहण्याची शक्यता असून काही ठिकाणी हलका पाऊस पडू शकतो.
हवामान विभागाने पुढील चार दिवसांसाठी विविध जिल्ह्यांना यलो अलर्ट जारी केला आहे. ९ ऑगस्ट रोजी मध्य महाराष्ट्र, उत्तर महाराष्ट्र आणि मराठवाड्यातील बहुतांश भागांत ताशी ३० ते ४० किलोमीटर वेगाने वारे वाहण्याची शक्यता आहे. यासोबतच विजांच्या कडकडाटासह वादळी पावसाचा अंदाज आहे.
रविवारी जळगाव, नाशिक, अहिल्यानगर, छत्रपती संभाजीनगर, जालना, परभणी, बीड, हिंगोली, नांदेड, लातूर, धाराशिव, गोंदिया आणि नागपूर या जिल्ह्यांना यलो अलर्ट देण्यात आला आहे. या भागांत वादळी वाऱ्यांसह विजांचा कडकडाट आणि पावसाची शक्यता वर्तवण्यात आली आहे. काही ठिकाणी ताशी ३० ते ४० किलोमीटर वेगाने वारे वाहू शकतात.
यानंतर सोमवारी विदर्भातील जवळपास सर्वच जिल्ह्यांमध्ये हवामान विभागाने पावसाचा यलो अलर्ट दिला आहे. अकोला, अमरावती, बुलढाणा, चंद्रपूर, गडचिरोली, गोंदिया, नागपूर, वर्धा, वाशिम आणि यवतमाळ या जिल्ह्यांत वादळी वाऱ्यांसह मुसळधार पावसाची शक्यता आहे. विजांच्या कडकडाटासह पाऊस होण्याचा अंदाजही हवामान विभागाने व्यक्त केला आहे.
दरम्यान, ११ आणि १२ ऑगस्ट रोजी राज्यातील पावसाचा जोर कमी होण्याची शक्यता आहे. या दोन्ही दिवशी कोणत्याही जिल्ह्याला यलो अलर्ट देण्यात आलेला नाही. मात्र, राज्यात ढगाळ वातावरण कायम राहण्याची शक्यता असून अनेक ठिकाणी हलका ते मध्यम स्वरूपाचा पाऊस होऊ शकतो.
रविवार आणि सोमवार या दोन दिवसांत उत्तर मध्य महाराष्ट्र तसेच मराठवाड्यातील काही भागांत विजांच्या कडकडाटासह वादळ, हलका ते मध्यम पाऊस आणि ताशी ३० ते ४० किलोमीटर वेगाने सोसाट्याचे वारे वाहण्याची दाट शक्यता आहे. त्यामुळे या भागातील नागरिकांनी पावसादरम्यान आवश्यक ती खबरदारी घेण्याची गरज आहे.
