निकृष्ट जेवण, खिचडीत आळ्या आणि अस्वच्छतेच्या तक्रारीनंतर पोषण आहार व मिड-डे मिलच्या गुणवत्तेची होणार तपासणी
राज्यातील अंगणवाड्या आणि शाळांमध्ये विद्यार्थ्यांना दिल्या जाणाऱ्या पोषण आहाराच्या गुणवत्तेवर आता अन्न व औषध प्रशासनाकडून विशेष लक्ष ठेवले जाणार आहे. तुकाराम मुंढे यांनी राज्यभरातील अंगणवाडी तसेच शालेय आहार व्यवस्थेची तपासणी करण्याचे निर्देश दिले आहेत.
या तपासणी मोहिमेत अंगणवाडीतील पोषण आहार, शालेय पोषण आहार आणि मिड-डे मिलच्या गुणवत्तेची पडताळणी केली जाणार आहे. विद्यार्थ्यांना आणि बालकांना पुरवण्यात येणाऱ्या अन्नाच्या दर्जाबाबत अनेक ठिकाणांहून तक्रारी समोर आल्या होत्या.
काही घटनांमध्ये कडधान्यांना भूंगे लागल्याचे, खिचडीत आळ्या आढळल्याचे तसेच आहार तयार करण्याच्या आणि वितरणाच्या ठिकाणी अस्वच्छता असल्याचे प्रकार उघडकीस आले होते. या पार्श्वभूमीवर राज्यव्यापी तपासणीचे आदेश देण्यात आले आहेत.
नवीन तपासणी प्रक्रियेमुळे शालेय आणि अंगणवाडी पोषण आहाराच्या गुणवत्तेबाबत निष्काळजीपणा किंवा गैरप्रकार करणाऱ्यांवर कारवाई होण्याची शक्यता वाढली आहे.
