बुलढाण्यात राष्ट्रवादीकडून तीव्र निषेध आंदोलन; कार्यकर्ते संतापले!
बुलढाणा (Harshvardhan Sapkal) : काँग्रेसचे प्रदेशाध्यक्ष व माजी आमदार हर्षवर्धन सपकाळ (Harshvardhan Sapkal) यांनी काल राष्ट्रवादी काँग्रेसच्या महिला नेत्या सुनेत्राताई पवार यांच्यावर केलेल्या अत्यंत खालच्या पातळीवरील टीकेचे तीव्र पडसाद आज बुलढाण्यात उमटले. सपकाळ यांच्या या विधानाचा निषेध करण्यासाठी आज बुधवार ६ आगस्ट रोजी राष्ट्रवादी काँग्रेस पक्षाच्या वतीने स्थानिक छत्रपती शिवाजी महाराज स्मारकासमोर भव्य आणि आक्रमक निदर्शने करण्यात आली. यावेळी कार्यकर्त्यांनी हर्षवर्धन सपकाळ यांच्याविरोधात जोरदार घोषणाबाजी करत परिसर दणाणून सोडला.
दुःख विसरून कामाला लागलेल्या ताईन वर टीका करणे हीच का काँग्रेसची संस्कृती का ?
आंदोलनादरम्यान पदाधिकाऱ्यांनी काँग्रेसच्या मानसिकतेवर तीव्र प्रहार केला. उपमुख्यमंत्री अजितदादा पवार ह्यांचे कुटुंबातील वैयक्तिक दुःख बाजूला सारून तातडीने महाराष्ट्राच्या कारभारात आणि जनतेच्या सेवेत संपूर्ण कुटुंब रुजू झाले आहेत. संपूर्ण कुटुंब अजूनही या दुःखातून सावरलेले नसताना, काँग्रेस नेत्यांनी अशा प्रकारे राजकीय चिखलफेक करणे अत्यंत दुर्दैवी आहे. महिलांचा सन्मान करणे काँग्रेस पक्ष पूर्णपणे विसरला असून, सपकाळ यांच्यासारखे 'वाचाळवीर' नेते स्वतःच काँग्रेस संपवण्याचा घाट घालत आहेत, असा घणाघात यावेळी करण्यात आला.
या आंदोलनात राष्ट्रवादी काँग्रेसचे प्रमुख पदाधिकारी आणि शेकडो कार्यकर्ते मोठ्या संख्येने सहभागी झाले होते. यामध्ये प्रामुख्याने बुलढाणा तालुकाध्यक्ष निलेश देठे, शहराध्यक्ष अनिल बावस्कर, युवक राष्ट्रवादी काँग्रेसचे जिल्हाध्यक्ष मनीष बोरकर यांच्यासह विशाल फदाट,रामराव नाईक, इम्रान पठाण, रियाज मिर्झा, जगन कानडजे, श्रीराम सुसर, दीपक मोरे, विशाल सोनूने, दिपक गायकवाड,किरण कानडजे, महेश देवरे, मुन्ना पैठणकर, संतोष पवार व इतर अनेक पदाधिकारी व कार्यकर्ते उपस्थित होते. सपकाळ यांनी जाहीर माफी न मागितल्यास हे आंदोलन आणखी तीव्र करण्याचा इशारा राष्ट्रवादीने दिला आहे.
