भिवंडी (Bhiwandi Fire) : भिवंडी तालुक्यातील खाडीपार परिसरातील मूलचंद कंपाऊंड येथे असलेल्या ऑइलच्या गोदामाला भीषण आग लागल्याची घटना समोर आली आहे. या गोदामात मोठ्या प्रमाणात ऑइलचे ड्रम साठवून ठेवण्यात आले होते. त्यामुळे आग लागल्यानंतर काही क्षणांतच तिने विक्राळ रूप धारण केले.
मिळालेल्या माहितीनुसार, आगीचे नेमके कारण अद्याप स्पष्ट झालेले नाही. मात्र, ज्वलनशील पदार्थांचा मोठा साठा असल्याने आग वेगाने पसरत संपूर्ण कारखान्याला वेढा घालत अखेर संपूर्ण गोदाम जळून खाक झाले. आगीची तीव्रता इतकी होती की धुराचे प्रचंड लोट आकाशात उसळताना दूरवरूनही दिसत होते.
घटनेची माहिती मिळताच अग्निशामक दलाची एक गाडी तात्काळ घटनास्थळी दाखल झाली असून, आग विझवण्यासाठी प्रयत्न सुरू आहेत. आग नियंत्रणात आणण्यासाठी आणखी गाड्यांची मदत घेण्यात येण्याची शक्यता व्यक्त केली जात आहे.
या आगीत मोठे आर्थिक नुकसान झाल्याचा अंदाज व्यक्त करण्यात येत आहे. सुदैवाने, या घटनेत अद्याप कोणतीही जीवितहानी झाल्याची माहिती समोर आलेली नाही. दरम्यान, प्रशासनाकडून आगीचे नेमके कारण शोधण्याचे काम सुरू असून, परिसरात खबरदारीचा उपाय म्हणून सतर्कता ठेवण्यात आली आहे.
