नवीन सोयाबीन खरेदीचा शुभारंभ; पहिल्याच लिलावात ६,१०० रुपये प्रतिक्विंटल दर

रिसोड (Risod Bazar Samiti) : स्थानिक कृषी उत्पन्न बाजार समितीमध्ये नवीन सोयाबीन हंगामाच्या खरेदीचा शुभारंभ करण्यात आला. या हंगामातील नवीन सोयाबीन घेऊन आलेले शेतकरी एकनाथ मुंढे (रा. सावरखेडा) यांचा बाजार समितीचे सभापती विष्णुपंत भुतेकर यांच्या हस्ते टॉवेल व टोपी घालून यथोचित सत्कार करण्यात आला. शेतकरी एकनाथ मुंढे यांनी विक्रीसाठी आणलेल्या सोयाबीनचा लिलाव बाजार समितीमधील 'नम्रता ट्रेडिंग कंपनी' येथे पार पडला. या पहिल्याच मुहूर्ताच्या लिलावात नवीन सोयाबीनला ६,१०० रुपये प्रति क्विंटल असा समाधानकारक भाव मिळाला.

​या (Risod Bazar Samiti) खरेदी शुभारंभप्रसंगी बाजार समितीचे सभापती विष्णुपंत भुतेकर, उपसभापती गजानन अवताडे, सचिव विजय देशमुख, संचालक रवींद्र चोपडे, रमेश गायकवाड, रामचंद्र बुधनेर, खरेदीदार असोसिएशनचे अध्यक्ष किशोर कोठुळे, व्यापारी मुरली शेठ मुंदडा, किसन अग्रवाल, गोपाल कासट प्रल्हाद गायकवाड यांच्यासह परिसरातील शेतकरी बांधव, व्यापारी, आडते आणि हमाल मोठ्या संख्येने उपस्थित होते.