हिंगणघाट (Hinganghat Bazar Samiti) : वाढत्या उष्णतेमुळे तापमानाचा पारा ४६ अंश सेल्सिअसच्या पुढे गेल्याने सर्वसामान्यांसह शेतकरी वर्गही तीव्र उन्हाच्या झळा सहन करत आहे. अशा परिस्थितीत हिंगणघाट येथील कृषी उत्पन्न बाजार समितीने शेतकरी आणि बाजार परिसरातील कामगारांसाठी स्तुत्य उपक्रम हाती घेतला आहे. (Hinganghat Bazar Samiti) बाजार समितीच्या छत्रपती शिवाजी मार्केट यार्डमध्ये गेल्या दोन दिवसांपासून निशुल्क आंबा कैरी पाण्याचे वाटप करण्यात येत आहे.
सध्या बाजार समितीत (Hinganghat Bazar Samiti) धान्याची मोठ्या प्रमाणावर आवक सुरू असून, खरिप हंगामाच्या पूर्वतयारीमुळे शेतकऱ्यांची बाजारात वर्दळ वाढली आहे. रखरखत्या उन्हामुळे शेतकरी, हमाल, व्यापारी, अडते आणि मापारी यांना मोठा त्रास सहन करावा लागत असल्याने बाजार समिती प्रशासनाने हा उपक्रम सुरू केला आहे. या उपक्रमांतर्गत दररोज सुमारे दोन हजार नागरिकांना आणि शेतकऱ्यांना थंडगार कैरी पाणी उपलब्ध करून दिले जात आहे. उन्हाच्या तीव्रतेत हा उपक्रम शेतकऱ्यांसाठी मोठा दिलासा ठरत असून, अनेकांनी याचे स्वागत केले आहे. कैरी पाणी पिल्यानंतर जणू काही अमृत मिळाल्याची भावना शेतकऱ्यांनी व्यक्त केली.
बाजार समितीचे (Hinganghat Bazar Samiti) कर्मचारी आणि युवा अडते शिस्तबद्ध पद्धतीने कैरी पाण्याचे वाटप करत आहेत. या उपक्रमामुळे बाजार समितीची शेतकरी हिताची भूमिका पुन्हा अधोरेखित झाली आहे. या उपक्रमासाठी बाजार समितीचे सभापती अॅड. सुधीर कोठारी यांनी पुढाकार घेतला असून, पुढील एक महिन्यापर्यंत हा निशुल्क उपक्रम सुरू ठेवण्याचा निर्धार त्यांनी व्यक्त केला आहे. यापूर्वीही एक रुपयात जेवण यांसारखे शेतकरीहिताचे उपक्रम राबवणाऱ्या हिंगणघाट बाजार समितीने शेतकऱ्यांच्या आरोग्याची आणि सुविधांची काळजी घेत असल्याचे या उपक्रमातून पुन्हा एकदा दिसून आले आहे.
