प्रति क्विंटल १४ हजार ते १५५०० रुपये दर, हळदीला आणखी दर वाढीची प्रतिक्षा
हिंगोली (Hingoli Bazar Samiti) : कृषि उत्पन्न बाजार समितीमधील शेती माल खरेदी विक्रीचे व्यवहार सोमवार पासुन पुर्ववत सुरू झाले आहेत. मोंढा सुरू होताच हळदीचे दर वाढल्याने आता हळदीची आवक दिवसेंदिवस वाढतच चालली आहे. मंगळवारी ३ हजार क्विंटल हळदीचा लिलाव झाला. आणखी २०० वाहनात हळद तशीच शिल्लक होती.
हिंगोली येथील कृषि उत्पन्न बाजार समितीमध्ये (Hingoli Bazar Samiti) हळदीला चांगले दर मिळत असल्याने जिल्ह्यास परजिल्हा व विदर्भातून मोठ्या प्रमाणात अनेक शेतकरी हळद विक्रीस आणत असतात. मध्यंतरी मार्च एन्ड व नाने टंचाईमुळे ४ एप्रिलपर्यंत हिंगोली कृउबासमध्ये शेतीमाल खरेदी विक्रीचे व्यवहार बंद ठेवण्यात आले होते. ६ एप्रिलपासुन बाजार समितीमधील शेती माल खरेदी विक्रीचे व्यवहार पुर्ववत सुरू झाले.
विशेष म्हणजे संत नामदेव हळद मार्केटमध्ये (Hingoli Bazar Samiti) हळद विक्रीसाठी वाहनांची रांगच रांग लागत आहे. बाजार समितीच्या यार्डासह रस्त्यावर अनेक शेतकरी वाहनातून हळद विक्रीस आणत आहेत. ७ एप्रिल मंगळवार रोजी ३ हजार क्विंटल हळदीचा लिलाव झाला. हळदीला १४ हजार ते १५५०० रुपये असा दर मिळाला. हळदीचे दर वाढल्याने आवक वाढतच चालली आहे. आणखी २०० वाहनामध्ये हळद लिलावासाठी प्रतिक्षेत आहे.
