दुबई-तेल अवीव विमानात को-पायलटकडून हल्ला; जखमी अवस्थेत कॉकपिटचा दरवाजा उघडून कॅप्टनने मदत मिळवली
फ्लायदुबईच्या FZ1073 विमानातील धक्कादायक घटनेनंतर भारतीय कॅप्टन स्मित मच्छार यांच्या धाडसाचे कौतुक होत आहे. दुबईहून तेल अवीवकडे जाणाऱ्या विमानात कॉकपिटमध्ये को-पायलटकडून कथित हल्ला झाल्यानंतरही मच्छार यांनी परिस्थिती हाताळण्यासाठी निर्णायक पाऊल उचलले. त्यांच्या या कामगिरीची दखल घेत अभिनेता सलमान खाननेही सोशल मीडियावर त्यांचे कौतुक केले असून, त्यांच्यासोबत प्रवास करण्यास आनंद वाटेल, असे म्हटले आहे.
सलमान खानकडून कॅप्टन मच्छार यांना सलाम
स्मित मच्छार यांच्या धाडसाची माहिती समोर आल्यानंतर सलमान खानने ‘एक्स’वर पोस्ट करत त्यांचे अभिनंदन केले. मच्छार यांनी दाखवलेल्या धैर्याला सलाम करताना त्यांच्यासोबत विमान प्रवास करणे आनंदाची बाब असेल, अशी प्रतिक्रिया सलमानने दिली.
कॅप्टन मच्छार यांच्या अनुभवाचा काही भाग पंतप्रधान नरेंद्र मोदी यांच्यासोबत झालेल्या व्हिडिओ संवादादरम्यान समोर आला. या संवादात मच्छार यांनी संकटाच्या क्षणी नेमके काय घडले, याची माहिती मोदींना दिली.
Kamaal kar diya pilot ji, hum sab aap ko salute karte hain will be a pleasure to fly with u.. Well done bro.. Capt #SmitMachchhar
— Salman Khan (@BeingSalmanKhan) October 2, 2026
FZ1073 मध्ये नेमकं काय घडलं?
३० सप्टेंबर रोजी फ्लायदुबईचे FZ1073 हे विमान दुबईहून तेल अवीवकडे रवाना झाले होते. विमानात १७४ प्रवासी होते, त्यापैकी २७ मुले होती. प्रवासादरम्यान कॉकपिटमध्ये कॅप्टन स्मित मच्छार आणि को-पायलट यांच्यात हिंसक झटापट झाली. या घटनेत मच्छार जखमी झाले आणि विमानाने अचानक मोठ्या प्रमाणात उंची गमावली. उपलब्ध वृत्तांनुसार विमान सुमारे १७,००० फूटांपर्यंत खाली आले होते.
या संकटाच्या काळात जखमी असूनही मच्छार यांनी कॉकपिटचा दरवाजा उघडण्यात यश मिळवले. त्यानंतर विमानातील लोकांना आत प्रवेश करून हल्लेखोराला आवरण्यात मदत झाली. विमानातील राखीव पायलटांनी पुढे विमानाचा ताबा घेतला आणि ते सौदी अरेबियातील तबूक येथील प्रिन्स सुलतान बिन अब्दुलअजीज विमानतळावर सुरक्षितपणे उतरवण्यात आले. विमानातील सर्व प्रवासी बचावले.
या हल्ल्यामागील नेमके कारण अद्याप तपासाधीन आहे. विविध देशांच्या संबंधित यंत्रणांकडून या घटनेचा तपास सुरू आहे.
मोदींसोबतच्या संवादात सांगितला थरारक अनुभव
अबूधाबी येथे उपचार घेत असताना कॅप्टन स्मित मच्छार यांनी पंतप्रधान नरेंद्र मोदी यांच्याशी व्हिडिओ कॉलद्वारे संवाद साधला. विमान वेगाने खाली जात असल्याचे लक्षात आल्यानंतर परिस्थिती अत्यंत गंभीर असल्याची जाणीव त्यांना झाली होती. जखमी अवस्थेत त्यांनी कॉकपिटचा दरवाजा उघडण्याचा निर्णय घेतला आणि त्यानंतर मदत मिळू शकली, असे त्यांनी मोदींना सांगितले.
मच्छार यांनी आपण मागील १७ वर्षांपासून विमानसेवेत कार्यरत असल्याचे आणि त्यापैकी ११ वर्षे कॅप्टन म्हणून काम केल्याचेही सांगितले. या संवादादरम्यान ते भावूक झाले होते.
संकटाच्या क्षणी हनुमान चालिसेचा आधार
या प्रसंगातील आणखी एक बाब मच्छार यांनी मोदींसोबतच्या संवादात सांगितली. कठीण परिस्थितीत आपण हनुमान चालिसेचे पठण करतो आणि विमानातील या संकटाच्या वेळीही तेच करत असल्याचे त्यांनी सांगितले.
विमानाची उंची वेगाने कमी होत असताना आणि स्वतः जखमी झाल्यानंतरही मच्छार यांनी परिस्थितीला सामोरे जाण्याचा प्रयत्न केला. त्यांच्या या अनुभवामुळे या घटनेनंतर त्यांच्याविषयी मोठ्या प्रमाणात चर्चा सुरू झाली आहे.
पंतप्रधान मोदींकडूनही कौतुक
पंतप्रधान नरेंद्र मोदी यांनी कॅप्टन मच्छार यांच्या धैर्याचे आणि प्रसंगावधानाचे कौतुक केले. गंभीर परिस्थितीत जखमी असूनही त्यांनी घेतलेला निर्णय महत्त्वाचा ठरल्याचे मोदी यांनी म्हटले.
या घटनेनंतर इस्रायलचे पंतप्रधान बेंजामिन नेतन्याहू यांनीही मच्छार यांच्या भूमिकेचे कौतुक केले आहे. दरम्यान, हल्ल्याचा नेमका हेतू आणि संपूर्ण घटनाक्रमाबाबतचा तपास अद्याप सुरू आहे.
