परभणीतील बनवस शिवारात अज्ञात तरुणाचा मृतदेह आढळला अपघात की घातपात?  

पालम पोलिसांसमोर आव्हान

परभणी (Parbhani dead body) : पालम तालुक्यातील मौजे बनवस ते माळेगाव रस्त्यावर खडी मशीनजवळील वळणावर एका  सुमारे ३२ वर्षीय अज्ञात तरुणाचा मृतदेह आढळून आल्याने परिसरात खळबळ उडाली आहे. संबंधित तरुण मोटारसायकलसह खड्ड्यात पडलेल्या अवस्थेत मृत आढळून आला.गावातील काही मुले व्यायामासाठी गेले असता त्यांना रस्त्याच्या कडेला खड्ड्यात एक व्यक्ती पडलेली दिसली. जवळ जाऊन पाहणी केली असता तो मृत अवस्थेत असल्याचे लक्षात आले. त्यांनी तातडीने गावचे पोलीस पाटील भाऊसाहेब मोहनराव कदम यांना दूरध्वनीद्वारे माहिती दिली. पोलीस पाटील कदम यांनी त्वरित पालम पोलीस ठाण्याशी संपर्क साधून घटनेची माहिती दिली.

माहिती मिळताच पोनि. एस. के. खटाने यांनी बिट जमादार गणेश खोमणे, सुदाम धुळगंडे आणि पी.आर. सपकाळ यांच्यासह कर्मचार्‍यांनी घटनास्थळी धाव घेतली. पोलिसांनी घटना स्थळाची पाहणी करून पंचनामा केला. पाहणीत दुचाकीचे विशेष असे मोठे नुकसान झाल्याचे दिसून आले नाही. (Parbhani dead body) घटनास्थळी रक्तस्राव झाल्याचेही आढळले नाही. मृताजवळ एक मोबाईल फोन सापडला, मात्र त्यामध्ये सिमकार्ड नसल्याचे पोलिसांनी सांगितले. ओळख पटवण्यासारखा अन्य कोणताही पुरावा घटनास्थळी मिळून आलेला नाही.

या सर्व बाबींच्या पार्श्वभूमीवर प्रथमदर्शनी हा( Parbhani dead body) अपघात असल्याचा अंदाज व्यक्त होत असला तरी घातपाताची शक्यताही नाकारता येत नाही. त्यामुळे हा मृत्यू नेमका अपघाती आहे की घातपात, याचा तपास लावणे हे पोलिसांसमोर मोठे आव्हान ठरत आहे. दरम्यान, पालम पोलीस करत असून पुढील तपास सुरू आहे.